.. ماريونيت
إرخى الحـِبال ع الأرض
دمعى اللى سال ع الخـد
محتاج أوى لإيدى
و أنا إيدى مش طايلة
و إنت شاددها .. شـد
و عشان ماتنهى العرض
متحملاك .. ســـــيدى
غير صمتـــى مش قايلة
لَبّسـْتِنِى فى هلاهيـل
ألوانها ظلمانى
متزوقة بشخاليل
دبابيسها هريانى
جسمى اللى كله خشب
بيحس و يعانى
و يصقف الجمهور
تسحبنى أعيد تانى
ياما النفوس شايلة
همك أكون بريموت
و الحبل آخره معاك
همى إن مرة أموت
فى الكدر أكون وياك
حلمك تكون مشهور
حلمى أن أكون لمساك
كل العروض .. زايلة
ع الرف .. كَوّمتنى
و أنا للسقوط آيلة
مسنودة بوجودك
عايشة على جودك
تبعد … تروح الروح
و تروح .. أروح مايلة
وقـّف أوام العرض
و إرخى الحبال ع الأرض
و إطفى كمان النور
محتاجة حضن .. شهور
علشان أكون هايلة
.
و يصقف الجمهور
