ط
الشعر والأدب

مجاراة شعرية بين الشاعرين فتحى الحصرى ومحمد هيكل

111
صديقى الشاعر الكبير العقيد محمد هيكل لديه خفة ظل متناهية فى كتابة الشعر فهو الوحيد الذى يجعل الكلمات تقفز من قلمى لتجارى خفة ظل مايكتب واليوم جرت الأمور بالعكس فقد كتبت أنا بعض الأبيات لأفاجأ به وقد جارانى بأجمل منها فأردت ألا أحرم القراء من متعة قراءة ماكتبة الشاعر الرائع محمد هيكل
فقد كتبت أنا
………………………………..

بتقوللى بحبــك وانا مــالى
كان مالى ومال دقات قلبك
أنا راجل دوغــرى وطــوالى
مش عايز عطفك ولا حبـك
………….
أصل انـت عواطفــك برانى
مغشوشة وكدبك خلانى
ماآمنش دقيقة ولا ثوانى
ولا ناقص همك ولا غلبك
…………..
بتموت ف الغمزة وف اللمزة
والشعر ابو تشكيلة وهمزة
محتار بين فكرى وبين حمزه
ومتهنى بلمتــهم جنبــك
………….
الحب لواحد مش ميــــة
يابو قلب مساكن شعبية
وكلامك مايخيلش علية
صدقنى مافكرتش أحبك
ــــــــــــــــــــــــــــــــــــــــــــــــــــــــ

وقد باغتنى الشاعر محمد هيكل بتلك الأبيات ردا على ابياتى
بتقــــولى بحبك … و بعينهــا
وانا عامــــل إن أنـا من بنهـــا
أنا راجــل دوغــري وشـرقاوي
ولا ناوي اتبهـدل علشـــانهــا
.
مشـاعرها عـيره ومش أصلي
ومحـال هتحافظ على وصـلي
مش ناقـص تتعـبلي مفـاصلي
.أنا عنـدي تلاتـه أحسن منهـا
بتقــــولى بحبك ….. و بعينهــا
.
بتهيـص لو كـام حـــد ناغشهـا
ومـجـــــرد كلمـــــة بتروشهــا
فرحـانه بـ لـمـــة ألاضـيـشــهـا
وغــــــرورهـا تـمـلّـي مجننهــا
بتقــــولى بحبك ….. و بعينهــا
.
الـحــب لواحــد مـش دســـتـه
يا ابوقلـب بيعشـق بالواسـطـه
أنا هـنـزل منـك هنـا يا اسـطى
وحكايتى معــاك انا هـدفـنـهــا
بتقــــولى بحبك ….. و بعينهــا

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى