خاص بمسابقة العامية
لمهرجان همسة 2017.
قصيدة عامية بعنوان
موت وحياة
اسامه صبحي محمد
……
وهو الموت بطعم الحياة
ولا الحياة بطعم الموت
سؤال عايش بتغلغل في شق الروح
أبويا من صباح يشقى
بكاه شغله في سفينة نوح
وأمي حالفه ع الختمه
متاكل لو تروح الروح
ونظرة حيرة بين الاتنين
يا ابويا يا اللي من صلبك
خرج موسى
وكان أيوب
متحكيلي عن الرحلة وع المكتوب
على بكرة اللي مستنظر شواشي حبوب
عشان يتستر العاشق مع المحبوب
فقالي جنوب
تروح شايل لنا المكتوب
وبلغ عنا في الحضرة
يا حاضرة هم
عاصرة قلوب
ولا ترجعش غير بيها
عطاني رغيف
وقالي لاجل تستقوى
وعودي نحيف
رفعنا اللقمه من قوتنا
انا وامك وكل اخواتك اتنزلوا عن المصاريف
ركبت القطر وركبني
على بكرة اللي غلبني
عشان اسال سؤال متشال
علي كتاف الهوى الميال
وهو الموت بطعم الحياة
ولا الحياة بطعم الموت
……..
نزلت جنوب على قناوي
لمحت الرمش كان ناوي
يلاعب موهجتي تحطيب
رفع نبوته والتاني مجاني طبيب
وتالت مرة من ناري هوا ما يطيب
وانا ف الاصل متحني
كفوفي تعشق التغريب
خيام ناصبتها ناس عاشقة
وناس نصبتها ع العاشقه
وكام معشوق بلا عاشقة
يا ناعسة فين ضفايرك فين
انا مربوط بمنديلك
بغنيلك
في قلب الليل
وليل الغربة ميت ليلة
ما دام الوعد مش عارف يعود ليلة
وبتقدم عشان اسال مقام الشيخ
لقيت طارحة ومشدودة
عجوز من الهم مكدوده
بتتمسح هنا ف اعتاب
وتشكي المر والحسره
مفيش مطره
ولا عدش حدانا كتاب
وليدي من سنين فاتت
ترك ايدي
ومن يومها معدش النبض لوريدي
يا مين يقدر يجبهولي
ابوس رجلك يا سيدنا الشيخ
دموعي حلفه يوم متشيخ
لحين ميعودلها تاني
وليدي كيف تعيش وازاي
مين ف الغربه يشفعلك
لقيت امي بتندهلي هنا في صوتها
وابويا الشيخ بينظر لي على عودها
فرد الايد وتعشقهم صوابعها
يا امي يكفى هم ونوح
طوفان الغربة رجعلك سفينه نوح
لقيت الحضن بيساعني
ويلسعني
لهيب العشق من قولها
وشمت شفايفي على قولها
وكنت بقولها يا امي
لقيت النبض راح منها
في حضني رحت اكفنها
واسبلها
وادفنها في شرياني
واكتب فوق رخام قلبي
حياتها خلصت العاشقه
وانا اللي كنت ناوي اسئلها عن حالها
سبقني الموت وهو اللي سائلها
وهو الموت بطعم حياة
ولا الحياة بطعم الموت
…….
وع الجدران لقتني بشوف
في ناس بتطوف
وناس ضحكتها لونها الخوف
وناس نادرة لو اتوفق هيدبح نعجتين وخروف
وهمس حروف
نده قلبي
لقتها ع الجدار قبلي
بتدعي لروحنا تتلاقى
ولا ترجعش ع العادة
بايد فاضية وقلب ضعيف
زرعت الخطوة والتانية بلا تحريف
قتلني خريف
وفين هي
د كانت لسه في ايديا
تكونش عشقت جنية
ودوري ع الجبال دوري
يا اه طلعه من جوفي وجه دوري
ادور ع السؤال ولا ادور ع اللي خد دوري
لقيت رجلي بتسحبني على خيمة
عيوني م البكا غيما
بتمطر سهمها تجريح
وغجرية تقول اقعد
وكردنها على نهدنها ما يقعد
وناولتني دكر مغشوش
وقالت اسئل المجاريح
و وشوش كل ذرة ريح
فرديت الوليد ليها
فجمعت كل اولادها
وبدرتهم على البلدان
وخطت بالايدين نهرين
وترعه واصله ما بينهم
وانا بينهم
وبتفرج على روحي
لقيت الدمعة نار تكوي
وعقدة في اللسان تحوي
كلام مسموع
وانا مصلوب على كلمه بصوت مسروع
اخدني رجوع
وانا مش عارف الحاله
كلام عقلي بيوجعني ولا د كلام الجوع
ووليت الخروج منها
فقالت كلمه تأولها
غرام وبعاد
وليه الكلمه دي في جوفي انا بالذات
وكيف تعشقني مولوده
وانا سواح ومش موجود
نداني الصوت ومن تاني
وهل يمكن اكون موعود
الاقي للسؤال مرسى
وهو الموت بطعم حياة
ولا الحياة بطعم الموت
………
وسمعني الصلاه ع الزين
يقول مداح كحيل العين
ويحكي عن جراح وانين
حكايه حب بين قلبين
بهية صبية من الجنه وعاشقة ياسين
و100مداح بيتنافسوا على الزنازين
و100نوري بيتناحروا على القرشين
وكام عمدة كبر كرشه من الفدادين
وكام ظالم في لحظة موت بيترجي كلام شفاتين
وديك نافش هناك ريشوا بيتعارك
وصحن الفتة باللحمه عليه قاعدين
ووسط الخلق
لمحتوا بيخرج من عباية شيخ
جريت بالخطوة اتمسح للمس ايديه
والم من الرمال حبه
سبقني السامري بحبه
وحط ايديه
يا ريت موسى فيوم يرجع
يرد الحق ويشفعلي اكون له اخوه
وامد الايد في بطن الحوت
اجيب يونس
يا بحر من الظلام عايم على ضلي
انا مرهون على كلمه يا ريت قوللي
ودرويش المقام يهتف
وانا خلفه بكلام يحدف
يا مؤمن عود لاوطانك
ابوك بيموت من الغربه
وامك يومها تعبانه
لقيت البيت سواد كالح
على ضلعي شجر سارح
بيغطي الجسم بالابيض
ويحدفني بغربة روح
يا خلق ليه تغطوتي وفيه الروح
معدش الكون بيسمعني
ولسه السؤال داير ما يرحمني
وهو الموت بطعم حياة
ولا الحياة بطعم الموت .
اسامه صبحي محمد
جمهورية مصر العربية
القاهرة
