ط
الشعر والأدب

نجوم النهار . قصيدبقلم الشاعر أحمد صبرى


نجوم النهار
احمد صبري

الكلام جوايا ساكت
والحنين ملاني مرار
حبيبتي راحت بس سابت
قلبي بيموت انتظار
العشم مكانش ف محله
والامان هرب من اهله
اللي فات زي اللي قابله
غدارة يانجوم النهار

بنحلم وغيرنا يحقق
احلامنا بتبكي عنينا
ونندم وقت مانتفرق
ووجعنا بيكسر فينا
السكة صعبة وبتعذب
وقلوب كتيرة بتتقلب
ليه الحقيقة بتتكدب
وليه بتغرق امانينا
نقوم ازاي ونمشيها
وكل موجة بنعديها
بتيجي الاقوى بعديها
والرحمة تحرم علينا

قرب العيد البعيد
وراح لصاحب نصيبه
لما نعشق من جديد
راح اقول للقلب عيبه
انه بيصدق اوهام
وانه بيسلم لكلام
انه بيحس بغرام
هايجي يوم يسيبه
قلبي ياما بينخدع
بيعجبه دور الجدع
ومهما بيشوف البدع
ياخده الحنين ويجيبه

الف مبروك الفرح
ومش مهم الاعتذار
ذاد الحنين لما طرح
والقسمة ضربتني نار
الذكرى بتيجي تفكرني
اللي جرح واللي هجرني
وبدعي ياربي تقدرني
ع الغدر وع الاشرار

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى