ط
الشعر والأدب

واحشانى ريحتك ياوطن. قصيدة للشاعر / محمد زهران


واحشاني ريحتك يا وطن

ريحة ضريح السيدة

ريحة طلوع الصبح ف عيون المدي

ريحة الشنط وانت ف طريق المدرسة

ورد الجناين بالندي

ريحة كتاب الفسلفة

ريحة الخشب

ف المسطرة في شكل تي

لما دخلت الهندسة

فجأة التقتني دايخ بدور

والبرد جالي باقوي دور

شميت ساعتها ف وقتها

ريحة الدوا ويا الكلور

لما دخلت الحميات

من عمر فات

ريحة الغطا لما البرودة تلسعك

وتشم دايما بعدها ريحة الشتا

ريحة الريحان اللي تملي ف سطحكم

ريحة الخبيز اللي تملي ف سطحنا

وانت ِ وانا

بنلاغي بعض بغمزة مغموسة بأمل

والجي جايز محتمل

لما هنكبر نجتمع في عش خالي م الوجع

سامحيني ما طلعتش جدع جبت لورا

اصل الفرص دايما ساعتها مأخرة

رحت و حجزت التذكرة

ريحة الفراق

ريحة الغروب المزعجة

ريحة المسا

كل الروايح جوة روحي معششا

أجترها .. أشبع وادمع منها

تتسد نفسي ع العَشا

ريحة التراب

لما هعودلك وادفن

يوووووووووه

واحشاني ريحتك يا وطن

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى