ط
الشعر والأدب

وتانى تعود. قصيدة للشاعر / حلمى قاسم

حلمى قاسم
***************************
على قـــد ما شرباك الغربه

وعلى قد هروبك و الطفشان

لكنك مــــــش عارف تبعد

ولا قادر تتحدى النسيان

بتجي لك اوقــــات بتفكر

وخيـــالك ياخـدك للماضى

بتزوغ منـــه و تتنكر

و بتهرب من وش امبارح

بتقـــــاوح مع فخ الفكره

تتشبث بالزمن الفاضى

الزمن الخالى من الذكرى

او حتى تنط حيطان بكره

تخلط وتبدل ف الاوقات

لكن هيهـــــــــات

بتجيبك لحظــــات قضيتها

وتخبط …..تفتح لك بيتها

وتجيلك من وسط عيالها

تشاورلك تمســــــــك اولها

وتتمسح ف هدومها وشالها

تاخدك وتروح

للزمن اللى انت بتشتاق له

ومن كتر مـــا قلبك بيحبه

نفسك تنساه

وتملــــــــــى تلبخ وتسبه

إكمنك قــــــال ايه بتعايبه

مع إنك متأنس وياه

فى غناك كام اهه وتنهيده

وكإنك واخـــــــد تأبيــده

متلقح ورا سور النسيان

شكل الحرمان دبل وشك

والدنيا بتنفـــــــخ وتفشك

كاره عشك

وبتفصل فى شريط الذكرى

رغم إنك متستف جــــــواه
****************
قلم/ حلمى قاسم

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى