.
… ياعم جاهين ….
ومهما نقول ياعم جاهين
كلامنا كله ما يكفى
وإيه تعمل حروف مساكين
قصاد حرف اللى عاش يوفى
ويكتب عن شعور الناس
فيشعل جمرة الإحساس
فتلقى الكل قام لبى
وجاوب كلمته بحماس
ياحلو الطلة والتكوين
…………………………….. يا عم جاهين
ياعم جاهين ومهما نقول
هيفضل قولنا ناقص قول
يافخر وعزة لبلادى
غرامك ليها شرحه يطول
قضيت عمرك كما النسمة
بحمد وشكر للنعمة
تقدّر كل مين شافك
وعرفك حتى من كلمة
ياحس بيسرى فى الميادين
…………………………….. يا عم جاهين
صعيب جدا يغيب ذكرك
يا شخص فريد مفيش منك
صحيح ودعت دنيانا
لكن لسه الجميل فنك
بيوصف حالنا ويعلم
قليل الحيلة يتكلم
ويفهم كيف يجيب حقه
وأبدا إنه مايسلم
دا لو هتفوت سنين وسنين
…………………………….. يا عم جاهين
