….. المتاهه …..
وإنت تايه عن كيانك
عن وجودك عن زمانك
وإنت بتدور عليك
تلقى نفسك مش لاقيك
تلقي جواك حد غيرك
تبقي مش عارف مصيرك
والطريق اللي انت عارفه
واللي دايماً كنت شايفه
تبقي بتدور عليه
تلقي نفسك تُهت فيه
لما ليل الغربة ياخدك
وإنت وسط الكون لوحدك
والدموع تجْرح عنيك
والهموم تكتر عليك
وأما تحكي ولّا تشكي
ولّا لما عنيك بتبكي
وأما كل الناس تبيعك
والوَسَع مابقاش يسيعك
وأما خوفك يبقي صاحبك
والقلق دايماً مصاحبك
لما أيامك تفوت
ولّا أحلامك تموت
وإنت حيران فـ الطريق
أو غريب عن كل شئ
وإنت بتدور عشان
تلقى راحتك والأمان
مستحيل هتلاقي راحتك
ولّا يوم هتعيش براحتك
وإنت عايش في المتاهه
ضد نفسك مش معاها
قول لنفسك يوم كفاية
قبل ما تروح للنهاية
واستحي وفتّح عنيك
الحياة مش دايمة ليك
إحنا عايشين ف إختبار
وإنت ف إيديك القرار
صالح الأيام تصالحك
سامح الأيام تسامحك
حارب الحقد اللي ساكن
جوه قلبك
حب كل الناس عشان
الناس تحبك
مد إيدك للي جنبك
أوعى تقسى وتوجعه
واللي يشكي ولّا يبكي
خلي قلبك يسمعه
واعرف أن الكل ماشي
مهما طوّل ولا قصّر
ولّا دي معرفتهاشي
ولّا محتاج مني أفسر
اللي قبلك راحوا فين
كلنا متبرمجين
كل واحد جي دوره
كله واقف في طابوره
وأما بيأون الأوان
يبقي ذكرى ع اللسان
واللي يفضل منه سيرته
واللي سابه طول مسيرته
والأمان اللي إنت
بتدور عليه ..
لو بعيد عن ربنا
مش هتلاقيه ..
يبقي تعرف فين أمانك
قبل ماتّوه عن كيانك
قبل ما يغشك زمانك
قبل ما يُغرك شيطانك
وامشي حتي لو لوحدك
في الطريق لو كله عاندك
وارضِي رب الكون عشان
تلقي نفسك والأمان ..
تلقي راحتك والسكينة
دا الحياة رحلة سفينة
بحرها غدار وآسي
شوفنا منها كتير مآسي
واجتهد كتر ف زادك
قبل ما يجيلك معادك
قبل مايأون الأوان
ولّا تصبح شئ وكان
يلا دور ع الأمان
والأمان كله ف إيمانك
الأمان كله ف إيمانك
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
