انتفاضه
شعر / احمد محمد زايد
انتفضت وزهقى بان
وافتكرت ليالى زمان
لما كان بيتنا الكبير
حبه ناضح ع الجيران
ليل نهار الفرح فيه
كان زياده وكان كافيه
واما وقت الليل بيجى
كنت أقيده بشمعدان
والشجر كان فى المقابل
فى الصباح يطرح بلابل
والثمر يطرح غنا
والشيطان ماكانش يجرؤ
يوم يهوب عندنا
او يخبط ع البيبان
او يقرب مننا
ولا يهمس فى الودان
بيت خلاف كل البيوت
اصله مش ممكن يموت
كل يوم فيه الشجر
ع اللى ماشى يهز توت
واما يتنزل علينا
كان يفتح نور عينينا
ع اللى جه وعلى اللى راح
انما جات السفن
عكس مابتيجى الرياح
والكروش صبحت قروش
والجيوب حملت سفاح
واللغات اتبرجلت
والكلام على بعضه ساح
واكتفينا بالمواعظ
م اللى همه يبيع سلاح
والقلوب عبت هموم
والعيون طرحت نواح
لما اهملنا السبب
بس لومنا على الجراح
المؤلف / احمد محمدزايد
نادى ادب كفر الزيات ..غربيه
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
