ط
مسابقات همسهمسابقة الشعر

“اضحك كركر” مسابقة العامية للشاعر / د.أحمد رجب من مصر

“اضحك كركر”

اضحك كركر و اوعى تفكر عيش أيامك دى و قضيها
اضحك فرفش عدى و طنش سيبها لربك هيسويها
اضحك و الله الدنيا دى فانية و لا تستاهل نبكى عليها
بإيه هيفيدنا بكانا و ضيقنا و ليه الفرحة ما نخليها

اضحك سيبك م التكشيرة خلى همومك دى تنزاح
و املا حياتك دى بالضحكة و روح قضيها فى الأفراح
خلى بضحكك نفسك راضية و خلى كمان بالك مرتاح
و سيبك فكك م اللى يشكك و يسبب لك أى جراح

على إيه دايما شايل الهم و مقضيها دموع و آلام
على إيه دايما قافل حاجبك زانق نفسك ف الأوهام
افرح و امرح ياللا و هيص املا حياتك بالأحلام
و خلى حياتك حلوة جميلة من غير حزن تعدى أوام

ليه بتشيل الهم يا صاحبى و أنت بتملك لقمة و نومة
و عندك صحة و عندك مال و كتير ناس حواليك محرومة
لكن راضية بكل قدرها و بأرزاقها مش مهمومة
و دايما ضاربة الدنيا طبنجة حتى الآه فيهم مكتومة

ياللى نسيت الضحك تعالى و أنا أقولهالك دوغرى ف وشك
هى سنانك وقعت منك و لا الضحكة هتفلق وشك

عمال أقولك اضحك فرفش و سيبها لربك هيسويها
و سيبك بقى م الضيق و الهم و عيش أيامك دى و قضيها

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى