ط
مسابقات همسهمسابقة الشعر

اقولك سر..مسابقة العامية للشاعر/ حسن خلف عبد الحميد من مصر

حسن خلف عبدالحميد
مصر / قنا
المشاركة في مسابقة مهرجان مجلة همسة للآداب والفنون (الدورة الثانية)
في مجال شعر العامية
اقلك سر

اقلك سر
انا كداب
***
لا عيوك اول الحكايات
ولا آخر رحلتى انتى
ولا قلبى كان اصطفاكى
ولا رتلك فى الصلاة قرآن
ولا روحك انسابت كما الضى
ف شقوق البدن
ولا صوتك كان مطر
بيروى عطش السنين افراح
ولا كان اسمك تريمة عشق
فـ عروقى
ولا شوقى كان بيندهلك
فى ليالى الحنين
ولا كانت ايدك تطبطب على روحى
ولا كان حضنى فـ الشتا يدفيكى
ولا كان الليل بيعشق السهر
فى مخادعنا
ولا كان الفجر بيصلى على جبينك
ولا كنا بنقسم الضحكة بين شفايفنا
ولا دقت الشهد من ريقك
ولا حسيت معاكى طعم البيوت
ولا شميت ريحتك فى قمصانى
ولا كانت انفاسك الخضرا بتحيينى
ولا صحيت على زقزقتك
ولا شفت الدنيا بالالون
ولا شربت قهوتى محوجة بيكى
ولا طلع النهار لما ابتسمتى
ولا حضن الطريق خطاوينا
ولا ضمت ايدى لهفة صوابعك
ولا اداريتى م الشمس فى ضلى
ولا كنتى الوطن والناس
ولا احساسى بالالفة
ولا خانت دمعتى عينى
ولا جريت ورا طيفك
ولا بفتكرك ولا بنساكى
ولا بتجينى فى الاحلام
ولا بصرخ وحشتينى
ولا بسمعنى ولا بفهمنى
ولا بلقانى الا فـ عيونك
وعيونك آخر حكايات
العشق يا عمرى
مش قلتلك من الاول
***
انا كداب
وبحبك جدا

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange