ط
الشعر والأدب

الرسالة الأولي الي البحر..للشاعر السكندرى قدرى عبد السلام

1920529_367653403377290_1378336392_n
نبذة عن قدرى عبد السلام ..بقلم / نادو فتيحة

محامي وشاعر عامية
تم نشر اعماله فى العديد من المجلات الإلكترونية و
منهم ((دقة جديدة)) وكاتب رباعيات بالعامية المصرية
الشاعر السكندرى الراائع قدرى عبد السلام

(((الرسالة الأولي الي البحر))) 

يا بحر…

بقالي تسعتاشر سنة بحاول اكتب عنك حاجة ترضيني…

ومش عارف…

جايز اكون أعمي البصيرة ..

 مالجنون خايف…

نص عمري بفك خط الشعر فك..

وبشك شك…

بيخلي خطوتي الغارزة فرمالك ..

تزيد في الغرز…

أصلي ماليش في الفرز….

معرفش اميز الصَدَف عن فرافيت الصخور…

معرفش الف وادور…

لكن يا بحر بالقاني قدامك…

زي عيل صغير مش عامل الواجب…

وجاي بيستهبل لجل ما ينول السماح…

واما وصل يا بحر بااااااح!!!

وطلعت ستر وغطا…

واللغبطة…

كات من نصيب الواد…

اللي فضل مستحلي بوحه …

مستحلي نشر غسيل جروحه..

وكل سر بقصيدة..

أحلام بليدة…

كان مستحيل تتجاب…

الملح داب…

 

والراس خدت لون السحاب…

وانا لسه فاكر اني عيل صغير…

مش عامل الواجب…

وجي ابوح …

ومعلق استهبالي عالكورنيش!!!!

يا بحر..

خلص الكلام والقصيدة…

اللي ضاع نص عمري عليها…

لسه متكتبتش!!!!!!!!!!!!!!!!!!!!!!!!!!!!!

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى