انا مش فشار” للشاعر حلمي القاسم
********
عندى حكايه عجيبه غريبه
و اوعوا تقولوا انى انا فشار
شوفت النمله بتعمل عمله
جاره جاموسه وراكبه حمار
وشوفت الفيل ابو دم تقيل
شايل شنطه وفيهـــا خضار
اوعوا تقـــولوا انى انا فشار
شــوفت الأرنب قاعد يلعب
ويا التـعلـــب/ الــمكار
وشوفت القطه جالها زغطه
وراحت تجرى على العطار
وشوفت البطه بتلعب حَطه
تنط النطه كمــــا المسمار
اوعوا تقولــــوا انى انا فشار
شوفت الفرخه بتصرخ صرخه
لمـــــا خطيبها سابها وطار
وشوفت الديك الرومى بيضحك
نافش ريشه وهــات يا هزار
وشـــــوفت الـــوزه تهز الهزه
وحـــاطه الاحمر ع المنقــــار
اوعــــوا تقـولوا انى انا فشار
شوفت النونو قالب لى عيونه
وقال واء واء اتاريه محتـــار
وشوفت خروف ميت م الخوف
وبيفكرنــــــى انى انا جزار
وشوفت المعزه قايمه و فازه
وجايه بتســـــأل ع المنشار
اوعـــــــوا تقولوا انى انا فشار
شـوفت النعجه بتقلى العجه
وحاطه المقلــــى ف قلب النار
ماسكه البيضه وحتة جبنه
قولت باينه هيبقــــــى فطار
شوفت العرسه بتضرب بسه
وماسكه ف ايدها كمان انذار
اتارى البسه دى كانت حاسه
ان العرسه دى ام الفـــــار
اصـــل البسه كانت تتعشـــا
فار وكانه صبـــــاع منبــــار
اوعـــوا تقولـــوا انى انا فشار
شوفت حمامه مصاحبه يمامه
وجايه معاهــــا لباب الـــدار
وشوفت ناموسه لابسه عروسه
وقاعده تقــــول لعريسها اسرار
وشـــــوفت البقره بتنقر نقره
وترمـــــى الحبه تلاقــى عمار
اوعــوا تقـــــــولوا انى انا فشار
شوفت الناس سارحانه وساكته
قـــــــولت يا واد اديها هزار
يمكن نضحك لو علـــى روحنا
نداوى جروحنا كمــــا الشطار
جايز كـــــــدبه تضيع حسبه
تخلـــــي القلب يزيد اصـــرار
اوعـــوا تقــــــولوا انى انا فشار
شـــوفت الحلم حكيت الفيلم
وقولت كأنى مشيت مشــوار
اتارى العِشــه وكـــــوم القشه
كله حــــــدانا ف قلــب الـــدار
واوعوا تقـــولوا انى انا فشااااار
