لسه شايفة حالاً الحلقة الاولى من ممالك النار على النت — ماينفعش من الحلقة الاولى تكتب تقييم عن عمل فنى مداه ٣٠ حلقة — لكن فى ممالك النار اكتشفت انه ينفع — مش حاعرف اقول كلام جميل للمؤلف يستاهله بجدارة — معروف ان الحلقة الاولى فى اي عمل بتبقى حلقة للتعريف بالشخوص ومقدمة لفكرة — صعوبتها بتبقى فى الايقاع — حاختصر رايى فى اول حلقك بالنسبة للكتابة فى جملة — كان عندنا كاتب عظيم — اعظم من كتب فى الدراما التاريخية — اسمه محفوظ عبد الرحمن — عظمته حققها بعد اعمال كتير وسنين عمر اكتر — محمد سليمان اظن ده اول اعماله فى الدراما التاريخية — محمد ابتدى من اعلى نقطة وصلها استاذنا العظيم محفوظ عبد الرحمن — يخرب بيت جمال جملك السلسة المعبرة الفخمة من غير تقعير اللغة العربية وايقاعك اللى بالميزان ياأخى (( بالرغم من اول ظهور للقاهرة واحد حرامى بيسرق 😂😂)) بس معدية —- نتكلم بقى عن الانتاج — ايه العظمة دى — الانتاج ده بصرفه اللي واضح فى اللوكيشنات والصورة والملابس حاجة فخيمة ورزق كبير للمخرج والمصور والمؤلف والممثلين — الاخراج شغل اجانب — التصوير يتسقف له هو والاضاءة من هنا لحد الحلقة الجاية — التمثيل – -الاطفال خطفونى وعملوا لى حالة دهشة وسرقوا الكاميرا من الكبار سرقوها بضراوة وبلا رحمة — المزيكا نقدر نقول حلوة يعنى وللحديث باقية
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
