خاص بمسابقة العامية قصيدة( نوتة ورق) للشاعر/ أحمد سعيد عرفة من مصر

خاص بالمسابقة
قصيدة نوته ورق

نوته ورق
لاقيتها وسط حاجات
كتير متبهدلة
فتحتها وفضلت أقرا
ف اللى فات
ولاقيتنى عايش
وسط بحر الذكريات
لاقيتنى كاتب
ع الأمل حبة حاجات
كاتب كمان
عن الغرام والتضحيات
ولاقيتنى عامل ثورجى
فبعض الجمل والإفيهات
عامل مشاكل فى الدول
بشجب وبندب
فى الجرايد والقنوات
وكتبت ياما عن الغزل
بكل أسماء البنات
ونسيت مع النوتة الزمن
ولاقيتنى مرت بى الساعات
بس إكتشفت
إن أنا زى مانا
وكل حاجة كتبتها
عن الأمل والتضحيات
حتى مشاكلى مع الدول
وكلامى عن كل البنات
طلعت كلام على الورق
ولافيهش حاجة إتحققت
غير إنه أصبح ذكريات
مكتوبة فى النوتة الورق
مرمية فى وسط الحاجات

أحمد سعيد عرفة – مصر