بيجينى دور وبترتفع درجة براءة الاشتياق وقوام جدار الحلم يتحول ميدان وفجأة صورتك تترسم
فاجرى عليكى بابتسام
ما أعرفش ايه معناه
شعور لو هحضنك
منزوع جينات اتأخرت
ما لحقتيهاش
خبرة سنين اتبخرت
والقانى بهزى وانتحل
قلب البراءة
وبخاف عليكى
تمسكنى رعشة وانتفض
لو بالغلط ألمس ايديكى
بترجعينى لمية سؤال
أيام جنون الاسئلة
أما احنا كنا صحيح عيال
وخيالنا أصل المشكلة
بتعودينى ع الخصام من غير سبب
وترجعينى بضحكتك من غير عتاب
وبتاخدى قلمى للهوامش
والخواطر والقصص
والشعر لما بينفجر
فى قلب الحبيب
وهيام على البوم قديم
متشال فى جيب فستان جديد
والشمس لما تتعبك
م البص على جسر الطريق
كان نفسى اكتبلك ديوان
واهديه لعيونك
واخزق عيون الشمس
لما تزعلك
ماهو لسه يومها ما انتهاش
اسمك واسمى منقوشين
على فص فالصو
وانا خدت حرفك بالابر
نقشة ف قميصى
ولا عمرى انسى النظرتين
الفضاحين سبب الحكاية
وفراق بيحرق سكتين
قبل البداية
كان نفسى لما اتبدلت كل الحاجات
أصرخ وانادى فى المدى
عاوزك معاياااااااااااا
وف كل مرة بنتفض
ما اعرفش أفرق حلمى
من شكل الكابوس
احساس بذنب انى ما كنتش أنفعك
احساسى حتى ما كانش بكر
ما عرفش حتى يودعك
لو كنتى جيتى بعد منى بكم سنة
أنا كنت هفهم أى لهجة بتنطقى
وف ثانيتين هفتح بيبانى
والحضن يومها استوى
والنور بيقطع بس يومها بفعل فاعل
والشوق بيقتل بس لو ما احناش سوا
كان يومها مهما يغيروا ما يقدروا
ولا صدرى احساس بذنبك يقتله
ولا كل ساعة وكل يوم
يرجع عليا الدور فتجرى دمعتى
لولا انى بصرخ وبضمير
مع جرح ناى بيهزنى
ما أعرفش كنت ازاى هفوق
وأصحى بقول…وحشتنى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
