خاص بالمسابقه
قسم العامية
***************
السيد عبد الدايم … القاهرة
كنت زمان
علي سطوحنا
بحب العب مع نفسي
واجيب دبابير واجيب طراطير واتمايل
ولما الديك ينادي عليا من بدري
بافوق واتوضي مع الحاجه
وتديني فطاره واطلعله
حبة عيش مع اعواد الدره الناشفه
بابدرهم للكتاكيت في العشه
واستني تطلعلي الحاجه بالمصروف
واروح لعمنا البقال صباح الخير
صباح النور يا معروف
اديني شوية لب واتوصي
ومتنساش لترين جاز وعسليه
اخدت اجازتي وبراحتي يا عم دياب
علي السلم وانا طالع لقيت شنطه
فيها كرراريس وكشاكيل السنه الماضيه
شلتها علي اكتافي وطلعت بيها علي سطوحنا
جبت الخيط ويا البوص وقمت عاملها طياره
واشد الخيط واشد كمان عشان تعلا باحلامي
يا رب كريم انا مستني امل بكره
اكون طيار والف بحار
اكون فارس لكل بنات حينا الحلوه
او اكون دكتور زي ما ابويا بيقولي
او اطلع ظابط زي الحاجه ما تقولي
علي كتافي نجوم لامعه
ولما العتمه بتضلم بلم خيوطها وانا زعلان
بس عندي امل بكره يجي النور
وينادي الديك من بدري
واقوم واتوضي واصلي مع الحاجه
واطلع من بدري علي سطوحنا
واقول يا كريم واشد خيوط طيارتي
واطير بيها باحلامي لامل بكره
علي سطوحنا
