ط
مسابقة الشعر

خاص بمسابقة الشعر العامى (صندوق الذكريات ) للشاعر محمود وحيد من مصر

صندوق الذكريات
بقلم محمود حيد
…………………
جوة أحضان السنين
حكايات ما لهاش عدد
وحاجات دابت حنين
وحاجات صابها الهدد
وحاجات رايحة وجايه
بتلوم قلبى وعنيا
يا ابو القلب الحنين
راح فين قلب الولد
ولقيت وسط الحكاوى
كام قصة ما تتنسيش
دمعة وحبة غناوى
وجراح حالفة تعيش
قصة حبى اللى كانت
لسة ف قلبى ما هانت
صحت فيا المواجع
حية ما بتنتهيش
الروح حنت لقاها
راحت تجمع صور
ولقيتنى باروح معاها
أحضن ضى القمـر
إيدى دايبة فى أيديها
وأنده بسمة عنيهــا
تغسل جوايا همــى
وأنسى ظلم البشـر
كنا فى العشق سيرة
ابدا مالهاش مثـيل
هىً دايبة وأسيــرة
وأنا من غيرها عليل
لكن قدر الليــالى
فرق بينا الخطاوى
سرق الحلم اللى بينا
وسقانا الهجر ويل
سافرت عنى وغابت
ومعاها الفرح راح
وسنين العمر شابت
ما فضلش غير جراح
قصة جوايا عايشة
ويايا طول العمر
جوة مليون حكاية
أول وأخر سطر

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى