ط
مسابقة الشعر

خاص بمسابقة العامية ( سعيد قرفص) للشاعر بهاء الدين بدوى من مصر

خاصة بالمسابقة ..
===========

سعيد قرفص ..

~~*~~*~~

كان فيه زمان حلاق
إسمه سعيد قرفص

دكانه كان في بولاق
حارة حبيب مرقص

وصبيه في الدكان
يقولوا له ياجعلص

في ايديه منشة خوص
في النش كان متخصص

وان جاله يوم بقشيش
يفرح ويترقص

ويروح أوام يشتري
مصاصة ويمصمص

وتشوفه تقرف منه
كان حافي ومعمص

لسطى سعيد كان تلم
والبرد منه يرصرص

وكان عينيه زايغة
ويبص ويبصبص

لو واحدة عدت عليه
حاجـبه الشمال يرقص

وفي الموالد يروح
يلُغ فتة وحمص

وشنطته في إيديه
جواها موس ومقص

أهو برضه يسترزق
شعر ودقن وقص

وكان يطاهر العيال
ويقص ويقصقص

وفرصته في الزحمة
يخبص ويخبص

وفي يوم صاحبنا راح
مولد سيدي الآخرس

ندهت عليه واحدة
بصوت حنون مستكنيص

الوجه أبيض جميل
والوسط غصن يميل

على كتفها عيل
م الحر كان بيرفص

قالت له يااسطى سعيد
عايزاك ياشيخ قرفص

وكان سعيد كالعادة
حاجبه الشمال يرقص

قالت له يلا ياخويا
بسرعة خلينا نخلص

قال من عيوني ياجميل
ياحلو يامألوظ

القصد شالت الواد
وفرقت رجليه

وصاحبنا سن الموس
وعينيها جات في عينيه

وموسه كان بين ايديه
يترعش يرقص

وقطع له حتة زيادة
لابص ولا حـرّص

صرخ الولد صرخة
كأنه ديب عوّص

وأمه على صداغها
لطمت ومسكت فيه

قالت غيتوني ياناس
دم الولد راح يخلص

وبسرعة جات الشرطة
قبضت على قرفص

ودي آخرة أبو عين زايغة
واللي يحب يبصبص ..
بهاء الدين بدوى ..مصر

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange