ط
الشعر والأدب

صاحيين.. للشاعر / السيد سعيد الحاطي

السيد الحاطى
صاحيين للشاعر / السيد سعيد الحاطي

شكلك مش مظبوط
وعيونك فيها سر
فيكي حاجات بتموت
والحاله مش بتسر
اتكلمي هزي السكوت
عمر السكات ماكان مفر

هتسلمي تاني
وتنكسي راسك
ويبيعوا ويشتروا فيكي
والاسم حراسك
بس احنا لسه صاحيين
ماهو انتي تاجنا
واحنا للاخر مداسك
ومش هنسمح لاي حد
يجرح في يوم احساسك

عللي صوتك في السما
هزي الكواكب
نشفي كل البحور
واحرقي كل المراكب
عيدي تشكيل البشر
عيدي ترتيب الورق
نجي نفسك م الهلاك
ونجينا من الغرق
رجعي الماضي اللي فات
ورجعيلنا اللي اتسرق

عايز ابص في عيونك
احس بقيمتي جواكي
لاني بجد مجنونك
وعمري وهبته لهواكي
ومهما تغيبي مستني
عايش باملي في لقاكي

فمتسلميش كده بالساهل
وتدي خيرك لحد غيري
ما يستاهل
انا الاول وانا الاخر
انا ارضك وانا طينك
انا يومك واسبوعك
انا شهرك وعمري
حسبته بسنينك
انا هولك وانا هرمك
انا سدك وانا نيلك
انا نخلك وصفصافك
انا مريسه علي ضفافك
انا صوتك وانا هتافك
وانا الورد في بساتينك
فمتسلميش
لللي دبحوكي وهانوننا
لللي داسو فوق جبينك
وبايدهم خرموا السفينه
غرزوا السهم في ضلوعك
وزرعوا في قلبنا سكينه
فيه تار بايت ما بينا
ستين سنه لما استوينا
حرمونا من زرعنا
ونشفوا نيلنا علينا
بس العيب كان في مين
في نيلك وفيكي ولا فينا
ماهو برضه حاجه تجن
كان ناشف علينا
وليهم سدوده مفتوحه
بيرشوا بيه الجناين
ويغسلوا المغسول واحنا
من العطش حلوقنا مدبوحه

يانيل ده جبن منك
ولاده حكم الظروف
انك تشوفنا تداري وشك
وتبقا مش عايز تشوف
ان انت ياقبلهم
ان انت يابعدهم
تبقا نعجه وهما يبقوا
عليك خروف
ايوه الظروف
ردمتنا زيك
مااترمت
وانت اللي من مليون
سنه بتجري عمرك
مااتغلبت ولا اتهزمت
ولا حد عمره حط
ليك اي شروط
كنت بتجري علي هواك
وميتكط تنحت
بالرمش الشطوط

فسيبك م الذل وهوانه
وذكرايتنا المؤلمه
واحضن الحب واوانه
من القلوب المريميه
والقلوب المسلمه
احنا حلمك احنا حضنك
احنا ضحينا عشانك
بكل حاجه مممكنه

شكلك لازم ينظبط
يااحلي نجمه
نورت بين النجوم
انتي ضيي انتي نفسي
انتي زادي وميتي
وبالبسك تحت الهدوم
فمستحيل الماضي
يرجع بالقساوه والغباوه
بعسل دايب في السموم

شكلينا يامصر جندك
اغضبي وورينا عندك
زودينا بالايمان
حسسينا بالامان
أامرينا هنختزل سنين
العمر كلها ونعيشها يوم

يوم كرامتك وانتصارك
يوم ما غازك يبقا ملكك
يوم ما نيلك يروي دارك
ويتلم تاني شمل عيلتك
يوم ما غيرتك ترد لعروقك
وتغلي تلبي صرخة طفله
من غزه وتغيثها
تبقا هيه لللعروبه حارس
وربنا من فوق كل اللي
فوق حارسها
تبقا حلم كل عربي في الانتصار
والانتصار يكون عريسها

ياعروسه هتفرحي
بكره بعريسك
هتفرحي كل الغلابه
وهتفتحي بالخيرهويسك
واللي تعبان يستريح
واللي مكبوت ينسي كبته
واللي بات من غير عشا
واللي محروم م الدفا
واللي تاه واللي ضل
في يوم طريقه
والمحتاج تسدي حاجته
وقتك دلوقت ابتدا
واللي كان ماعدش وقته

فلازم شكلك ينظبط
اصل اللي عكنيننا اتربط
بس فاضل شخص بيحاول
يحله شكله في دماغه اتخبط
طول عمره كان مكتوم في قلبه
دلوقتي عامل واد لبط
بس بوعده انه يلمس
شعره منك دي
حاجه من باب العبط

فاتكلمي واتبسمي
وشدينا يمك نتحد
احنا ع الاخر حاولنا
ولسه برضه هنجتهد
ومتفكريش ان احنا
سلمنا مصيرك لحد
يوم بالزور شهد
احنا سايبينه لأوانه
بكره هيجمعنا الحساب
وعلي اد مابرطع في خيرك
بكره هيسف التراب
ويبقا عبره لللي عايز يعتبر
ما الذنب مش هين
ده ياما طارت فيه رقاب
واحنا ع الخر حاولنا
وعلي اد الذنب هيكون
من جنسه العقاب

مليون كيلو مربع
ومبنفكرش الا
في الدلتا والشريط
ومع اننا مش قوم تبع
تفكيرنا زييهم
ساذج اهبل عبيط
أليس فينا رجل” ينفع؟
ألا يوجد بيننا رجل” حويط؟
ياخد بايدنا يعدي بينا
يس تخريم السفينه
ويبحر بين السما والارض
ويفكرنا تاني ان احنا
لما في البادي اتخلقنا
اتخلقنا ياناس لبعض

فاحنا صاحيين…
ولو اننا فوقنا وصحينا متأخر
بس بنوعدك مش هنغفل
لحظه عنك يطول العمر
او يقصر

احنا هنبنيكي من تاني
والوقت اللي فات
انتهي زمنه طار
في الهوا واتبخر
والشتيمه والاهانه
دول انتهوا
واللي كان مبيتفهمش
بان وانكشف واتفسر
واللي كان فاكر انه
كسبان كل حاجه
حكمت عليه
الثوره يخسر
فاتكلمي واتبسمي
وشينا يمك نتحد
احنا ع الاخر حاولنا
ولسه برضه هنجتهد

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange