ط
مسابقة الشعر العامى

على الكورنيش. مسابقة الشعر العامى بقلم / محمد مصطفى ابراهيم قاعود من مصر

الاسم : محمد مصطفي ابراهيم قاعود
مصر – محافظة سوهاج
رقم موبايل للتواصل : 01062601639 – 01155050153
مشاركة في شعر العامية بمهرجان همسة الدولي للاداب والفنون
قصيدة : علي الكورنيش
*****************

كلامي وكل احساسي
لكل اتنين جمعهم حب
ع الكورنيش
في عز البرد اتقابلوا
جمع بينهم شعاع الحب
بنظرة عين وسحر الليل
وغنوة لثومة وسط النيل
خطفها بنظرته الأولي
وبسمتها اللي داب فيها
بدون ترتيب ولا مواعيد
خطفهم مركب العاشقين
وغنوة ف ليلة كات هادية
هنا كان شاب بيغني
في وسط الاهل واللمة
وصوت الكل كان عالي
علي انغامه بيغنوا
يعلي الغنوة وياهم
وتلمع عينه لو حنوا
لقصة حب او لفراق

ترجع عمرهم لسنين
صبايا وذكريات تصحى
تبين كل شكل حنين
في كلمة تهز وجدانهم
يغنيها اللي عاش وحده
ومستني يدق القلب
شبابه لسه ما اتهزش
وجرب ليل وسهد الحب
وفجأة ضاعت النغمة
وساب الكل ونسيهم
في حضرة نظرته الاولي
لبنت وأهل وصحابها
وجايه ف وسط موكبها
شعاع احساسه وقفها
وبطأ مشي خطوتها
فسمعت كلمته الاولي
وشافت نظرته الأولي
وردت نظرة بعيونها
بكل كلام
سكت صوت الكلام فجأة
فسمعت كلمة مش ساهله
علي اللي يحب ينساها
كلام الغنوة مترتب
عشان اللحظة اياها
دي كلمة بتمسح الدمعه
تنسي الجسم لسعه برد
تطمن قلب عاش خايف
وتبني القلب مهما اتهد
بحبك . كلمة لو طلعت
بتمسح دمع سال ع الخد
تطيب كل أوجاعي
وتمنع حزن طال واتمد
ومين بيحس بعيونهم
غير اللي حن لامبارح
لضمة ايد وشوق مواعيد
ووردة حب ورسالتين
ونظرة شوق من الشبابيك
تلخص ذكريات حبيبين
بنار الشوق ونار البعد
وأصعب لحظتين بينهم
سكت صوت الكلام اكتر
ما بين الأهل والأصحاب
دا عاشق حن وبيسأل
وليه بطلت الحانك يواد كمل
كلامك علا احساسنا
وصحى النبض
ومين هاحس احساسه
ولا اللي صابه من نظرة
دا صوته العالي مش طالع
ولحنه اتهد ميت مره
وعدا الوقت بزيادة
وقطر الساعة ما بيهدي
وبات يسأل نجوم الليل
لأول مره يسألها
هترجع تاني يا امبارح
عشان يحكيلها ويطول
ويوصف كل احساسه
فيبني اللحن م الأول
فراح من بدري واستني
ويتلفت شمال ويمين
وجات مخصوص عشان تفهم
وتتأكد من الاحساس
دا حب اللي اتولد بينهم
ولا احساس في ليل كداب
صارحها بكل اشجانه
ولحنه اللي اتولد ليها
وهي ترد من تاني
بنظرة عين يدوب فيها
ساعات عدت ما بين الاتنين
كأن الساعه مش هيا
وم اللحظة يفوت شهرين
سنه سنتين
وهما بيبنوا أحلامهم
يغنوا الحب في سنينهم
وينسوا البعد والحيرة
ويبدأ فصلها التاني
فياخد خطوته الأولي
تخبط ايده باب بيتها
يقابل أهلها ويطلب
سبيل وصله تكون ايدها
فيسمع من كلام مسموم
دا مهر الاخت كان عالي
وبيت والعفش م الغالي
وكله نصيب ومبنطلبش
شئ غالي
ومين هيحقق المطلوب
دا شاب واهو شاب من المكتوب
ورب العزة وصانا علي الاحسان
رسول الرحمة وصانا علي الاحسان
وقال افضلنا في البركة
بأقل مهور
وانتوا تقولوا مهر البنت
فيه مكتوب وفيه مشهور
وغيره من الدهب صافي
تلال وقصور
يا ناس خلونا نتعاند
في أفضل ما يعلينا
ونتفاخر بأن الخير يكون فينا
سلام لينا
ونهدم كل اركان الجشع
فينا
خلص كل الكلام بينهم
وقف شايل هموم سنه
ونظرة حب في عنيها
تقول دا حرام
بكلمة يهدوا احلامنا
وبكلمة يدمروا فينا
ولما اتقابلوا من تاني
لاخر مره هيشوفها
عيونهم جاية تتكلم
وهما سكوت
وأصعب لحظة وقت فراق
تطلع صوتهم الباكي فهو يقول
خلاص سامحيني وانسيني
هحاول برضه انساكي
وقلبك لو يحنلي يوم
قوليله انساه وعيش بكره
ترد ودمعها جاري كفاية عذاب
انا لو مره يوم قلبك
نسي حبي انا عمري
ما قلبي يدق من تاني
ولا بعدك يشوف احباب
فترجع نظرته الأولي
ف ليله غني لعنيها
وعاش احساسه من تاني
فهم مين قله لحظتها
وليه بطلت الحانك يواد كمل
خلاص اللحن بكاني
يا ريت ما بدأت م الأول
انا العاشق
ولحني قتلني ميت مره
ما فوقنيش من الماضي
دا غير ضمة ايدين دافية
بتوعدني وبتقولي ما ليش غيرك
ولا بعدك يدق القلب
حلفت باني ما اضعفها
ولو هوصل نهاري بليلي ما اخذلها
هانرجع مهما نتفارق
عشان نبدأ حكايتنا
حكاية حب وابتدأت
ما بيننا في يوم
علي الكورنيش

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى