قصيدة : أحلى جنية .بقلم / فتحي الحصري

أحلى جنية

باشوفك في الصباح نسمة

علي جبين الهوا الشارد

ياراسمة الضحكة والبسمة

علي القلب اللي كان بارد

****

بحبك طفلة بضفيرة

وعين بالكحل تتعايق

ورمش أصيل ماهوش عيرة

عليكي التقل اهو لايق

****

ياساحرة الكل بدلالك

وراسمة البهجة حواليكى

باشوف السعد راسم له

غناوى الصبح فى عنيكى

***

باشوفك بت جنية

وخارجة من كتاب حواديت

جميلة وغامضة وشقية

شقاوتك احلى م العفاريت

*****

بحبك ياللى ساقيانى

نعيم الحب بالكيلة

بحبك بنتى وحبيبتىي

ياساكنة القلب ياجميلة

*****

إهداء إلى ابنتىّ مريم وهمسة