ط
الشعر والأدب

قصيدة : إضحك .. للشاعر / رضا أبو الغيط

******

اضحك من قلبك للدنيا

وبلاش احزان

واسرق من عمرك كام ثانية

يلا يا انسان

ده الناس بتعيش علشان تلقى

ف الدنيا مكان

مفروش بالخُضرة وبالحٍنة

وحيطانه أمان

اضحك للدنيا هتضحك لك

وترحب بيك

وهترسم بالألوان شكلك

وتطوف حواليك

وان كنت عاوزها تعيش جنبك

وتقول شوبيك

اضحك من قلبك للدنيا

وبلاش أحزان

اضحك للناس اللي تملي

بتفكر فيك

وانسى الأحزان واوعى

خيوطها

تُشبك رجليك

لتعيش العمر اللي باقى لك

بين دمع عينيك

والحزن يفوق ويغني لك

غنوة توهان

اضحك للطفل اللي بيضحك

من غير مواعيد

واضحك للوش اللي تشوفه

مبسوط وسعيد

وبلاش تستنى عشان تضحك

أيام العيد

ده العمر بيجري ومش راجع

كده زي زمان

اضحك للدنيا عشان تضحك

ليك الأيام

واوعى الأوهام تسرق عمرك

وتعيش ف ظلام

واوعاك تسألني ولو مرة

الضحكة بكام

د الضحك مشاع واحنا أصحابه

وطريقه أمان

******************

رضا أبو الغيط

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى