****”””
دمعة نازلة فوق خدودي
زى نار ما بتنطفيش
كل ما ابني يقولي نِفسي
وألقى نَفسي تقول مافيش
امتى بس الحظ يضحك
للغلابة المحتاجين
وللا امتى الدنيا ترضى
تِسعد القلب الحزين
حد فيكو يقولي امتى
وللا امتى بس أعيش ؟؟؟
طول حياتي فوق كتافي
شايل الهم ف زكايب
والمآسي ف لون لحافي
حزن جوه الغُلب دايب
جوه مني غصب عني
بكتم الأهة ف سكات
واسجن الحزن اللي خلا
نبض قلبي يقول أهات
حد فيكو يقولي امتى
راح يكون لي جناح وريش ؟؟؟
واسبق الطير المسافر
فوق بلاد المعجزات
واقدر ابني لإبني جنة
طارحة فيها الأمنيات
وارسم الضحكة اللي تاهت
فوق خدود كل البنات
واقطف الحب اللي عشش
فى عيون الفاتنات
بس حد يقولي امتى
صورتي تبقى ع الأفيش ؟!
بعد طول الصبر صبري
صب ليا كاس دموع
وبإيديه الطايلة خدني
في طريق اللا رجوع
وابتديت أشعر بقلبي
اللي تاه بين الضلوع
بيناديني خد بايدي
وانزع الشوك من وريدي
واوعى يا ابني تاني تحلم
أو تفكر يوم تعيش
الحياه مش ناوية تطرح
ورد ليك فوق الخدود
والإيدين الساندة ضهرك
صابها عين قلب الحاسود
فاوعى تسأل ليه يا دنيا
طرح خيرك للقرود
وللا ليه الكلمة خافت
م المدافع والبارود
واحمد المولى إن حلمك
مستغطي بحمل خيش
**********************
رضا أبو الغيط
