ط
الشعر والأدب

قصيدة : البيوت جنب البيوت . للشاعر / شريف الانبا كاراس

البيوت جنب البيوت

والحيطان سانده الحيطان

مهما عشش عنكبوت

يفضل النور فى البيبان

والقلوب مليانه خير

لسه جوه الروح أمان

لسه موجود الضمير

والمكان هوه المكان

رصة العيش عند فرن

ولا شربات الجيران

ولا أيام الدراسة

والمذاكرة والجنان

والطبق بيدور ويتوزع

ملوش صاحب يبان

الملامح هيه هيه

والسمار باين كمان

حتى حواديتنا الشقية

والدفا أيام زمان

تعرف الصاحب بلونه

وافتكاساته وجنونه

عمر حيرنا شجونه

قضيناه عند الجيران

الصليب فى الحيط معلق

والهلال عند الميدان

عمر حتى الموت مافرق

ود عمره فى يوم ما هان

الف ميت مليون حكاية

تختصر كل اللى كان

اللى بيننا م البداية

حاجة أطول م الزمان

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange