مسابقة الشعر العامى

قصيدة : الحكاية . مسابقة الشعر العامي بقلم / إيمان السيد برعي

أنا هحكي عن حكاية
بطلة عايشة ف خوف ورعب
عايشة كل حياتها ثابتة
قلبها عمال بيبكي
مرة من الخوف على المريض
ومرة من الموت ولو بعيد
ومرة من دمعة ف عيون
أم علي ولدها الوحيد
ومرة من الطفل اللي ماسك
إيد أبيه وعمال بيبكي
بابا أرجوك رد مرة
نفسي اسمع بس صوتك
والجهاز يبدأ يصفر
صوته يعلي يعلي أكتر
تجري فجأة تخرجه
وتبدأ الإنعاش بخوف
قد خوف الطفل وأكتر
بس ملك الموت بيحضر
عينه فجأة لونها أصفر
والعيون تبدأ تبرق
و الأطراف تتحول لأزرق
قلبها يبدأ يبكي ويبكي
عايز يصرخ عايز يحكي
نفسه يقول للموت استنى
لسه هحاول لازم هقدر
انقذ أب لأبنه يعيش
بس الموت من أمتي استنى
او من أمتي يراعي نفوس
ممكن موتها يقتل ناس عايشين
تمر أيام وشهور وسنين
لما بتقفل عينه بأيديها
لحظة انا مهما هحاول أوصفها
بردو الوصف هيبقى عقيم
عمري ما هوصف وصف سليم
لحظة بتقتل كل مشاعرك
تقتل قلبك مليون مرة
وتبدأ تتعاد الكرة
مرة أب ومرة أخ ومرة زوج
ومرة أم ومرة أخت ومرة بنت ومرة زوجة
تبدأ تسمع صرخات بنت
وتشوف دمعة أخ علي أخته
وتشوف كسرة زوج
يحضن زوجته ويبكى بكسرة
ابن صغير خسران أمه
عمره ما كان الموت بيهمه
بس المرة كانت مرة
الموت كسره وعلم فيه
بطلتنا تحاول تواسيه
بس من أمتي الكلام
كان بيخفف وجع
بطلتنا بتنهي يومها كل يوم
بدموع عيونها
على اللي راحوا من ايديها
وكان أملها يقوموا تاني
كانت نفسها تبطل تعاني
من وجعها ع اللي راحوا
كل أملها
تشوف الفرحة ف عيون أهل
بس الأمر ده مش سهل
صعب تقول للموت تمهل
قالوا عليها ملاك الرحمة
بس الرحمة مش ف إيديها
ربنا أمره نافذ عليها
ادعولها تكمل وتكون أقوى
ادعوا لقلبها يعرف يستقوي
ادعولها تعيش.

شعر العامية المصرية
إيمان السيد برعي
01093577208

فتحى الحصرى

فتحى الحصرى .كاتب ومصور وصحفى عمل لأكثر من ربع قرن بالمجلات اللبنانية الشبكة وألوان ونادين . صاحب دار همسة للنشر والتوزيع .وصاحب موقع مجلة همسة ورئيس ومؤسس مهرجان همسة للآداب والفنون

مقالات ذات صلة

اترك تعليقاً

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى
Secured By miniOrange