قصيدة : المصطبة . مسابقة الشعر العامى بقلم / بكر بسيوني

خاص مسابقة مهرجان همسة الدولي في دورته العاشرة .. قسم الشعر العامي

الإسم / بكر بسيوني جوده

الشهرة / بكر بسيوني

محافظة / كفر الشيخ _ مصر

ت / 01118042969

رابط الصفحة

https://www.facebook.com/profile.php?id=1263036079

………….

القصيدة

______ ( المسطبة ) ______

وحشتني يا مه المسطبه

و اللمه و إحنا صغيرين

و الراكيه و كيزان الدره

و بلحه عيشه مرطبه

وولاد حارتنا الطيبين

وحشتني يا مه المندره

و ضيوف أبويا الفلاحين

و فطيره بالسمنه معطره

و إيديكي من ريحة العجين

بالبركه يا مه مبخره

وحشتني يا مه المسطبه

و اللمه في ساعة الغدا

و التوته فارده ضلها

و كلمة إتفضل يا حج

لكل عابر ع السبيل

وحشني أبويا و ضحكته

و خوفي من كفه التقيل

لما أعمل إللي ما يعجبه

كنت أجري يا مه و أحضنك

و اخبي وشي بهدمتك

و إنتي يا خضره بضحكتك

كان ينسي هم تقيل عليه

و بحنيتك ..

تقوليلي ليه يا بني الغلط

و تروحي يا مه و تراضيه

ينسي شقاوتي و غلطتي

و من إيديكي يشدني

و أنا برتعش ..

ماهو أصل أنا مجرب إيديه

علي خدي كات طرشه قوي

وحشتني يا مه شخطته

و ضحكتك مع ضحكته

وحشتني يا مه الدردشه

و اللمه في ساعة العشا

و إللي غضب ملوش نصيب

يبات كمان من غير عشا

لزوم الأدب لو يوم غضب

و ينحرم من الكلام و الفرفشه

وحشتني يا مه المسطبه

و النومه في حضن الدفا