شعور سخيف
انك تكون
أجمل ربيع
طرحك بديع
وهواك لطيف
وعيون حبيبك
م الرمد
شيفاك خريف
شعور بيقتل فرحتك
ويموتك
قبل الميعاد
ويزيد همومك ف الحياة
وتعيش ف دور المُرتجع
مِلك الوجع
غرقان ف بحر من الدموع
مش لاقي حد يمد لك
طوق النجاة
وتبيع بقايا الحلم
ف سنين جفاف العاطفة
جوه المزاد
علشان رغيف
تكله العيال
وام العيال
من غير ما يسأل عقلهم
ليه حلمهم
أصبح نحيف
ليه الأمانى أصبحت
ع الأرض طيف
جِدره ضَعيف
طَرحه مُخيف
يشبه مريض
مستنى ناسه تِسبله
فوق السرير
يشبه ضرير
عُكازه خانه وسَلِمُه
لأنياب حقير
شعور سخيف
انك تكون ف الكون رديف
محبوس ف قمقم
م الشكوك
والمجرمين بره القفص
بيٌشيلوك كل التُهم
وانت الشريف ابن الشريف
*****************
رضا أبو الغيط
Facebook Comments Box
