مسابقة الشعر العامى

قصيدة : شوية ساعات . مسابقة الشعر العامى بقلم / خالد محمد عبد المعطى

الاسم / خالد محمد عبد المعطى

الدوله/ جمهورية مصر العربيه

شوية ساعات

شعر عامى

..

..

شوية ساعات

باقيه فى العام اللى عايش

و يحصل العمر اللى فات ..

..

شوية ساعات

شابكه فى ديل مهر طايش

دايسه سنابكه فوق زهور الامنيات..

..

شوية ساعات

متفتته ثوانى و دقايق

متشتته سكران و فايق

و مثبته كل الحقايق بسلاح

فى ايد الحلم اللى حايش

مركب حياتنا ترسى فى جهه

و تفضل كده متوجهه فى كل الجهات ..

..

شوية ساعات

و ينكسر ضهر العروسه اللى كانت

من سنه

لابسه الثياب متلونه

ناقشه الكفوف بالحنه و بتشاور لنا

رغم الآلام عدت قوام

و كأنها كانت منام

و الوشم اللى زينت بيه كل ايد

نسيناه اكيد

الوشم صار تجاعيد

و الطير الجوارح فى السما

حواليها حام

مات اللى مات و عاش اللى عايش

و ما زادتش فينا غير شوية ذكريات..

..

شوية ساعات

و اخر نجوم ليل السنه

تبعد بعيد و تنطفى

و يملى السكات

الليل اللى كان مليان غنا

و يترعش قلب الزمان

اللى بدمانا دفى

و البدر اللى نور عام بحاله

رجع يضيع بعد اكتماله

و فى عتمة العمر اللى فايته

ضاعت عصايته

و مع كل غيمه بينكفى

يا دنيا بوجعنا اتفلسفى

و زينى بلوعة سهرنا الأمسيات ..

..

شوية ساعات

و يتولد مولود جديد

مجهول لنا

و احنا برضه مجهولين

هل يا ترا ناوى يعيد

من تانى حزن الامكنه

و غنوته على ناى حزين ؟

و لا فى كتابه مكتوب سعيد

و جاى يسعد قلبنا

و يداوى فى قلوب مجروحين ؟

يا بذرة العمر لخلايق

و لخلق تانى انت كفن

يا كدبه و بلون الحقايق

كام الف زيك اندفن

يا عام و جاى بشبابه عايق

بلاش تكون زى اللى فات

ما هو من سكات

و بدون كلام عمرك يا عام

شوية ساعات..

..
Facebook Comments Box

فتحى الحصرى

فتحى الحصرى .كاتب ومصور وصحفى عمل لأكثر من ربع قرن بالمجلات اللبنانية الشبكة وألوان ونادين . صاحب دار همسة للنشر والتوزيع .وصاحب موقع مجلة همسة ورئيس ومؤسس مهرجان همسة للآداب والفنون

مقالات ذات صلة

اترك تعليقاً

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى
Secured By miniOrange