ط
الشعر والأدب

قصيدة (كل يوم.) .. للشاعر/ سامح شعير

قصيدة

(كل يوم.)

للشاعر/ سامح شعير عضو نقابة اتحاد كتاب مصر

وفى البلكونة

كما العادة وقرب الفجر

ما بين الكرسي

       وسيجارة

وكوب الشاي

وعجل طايح على الأسفلت

خطا بتموت

وماسك كمامة وكرونة

أنا

الشارد كما الخافيش

في عتمة ليل في خرابه

أنا

ظالم أنا نفسي

صريع يأسى

صدى صمتي اللي جوايا

خمسين سنة

عدت كما الرهوان

والنتيجة أجلوها عن معادها

لأجل ما يرفعوها

أصل الحصيلة كلها أصفار

أول سيجارة..

شهادة باسمي

اللي كان بالغصب عنى

وتاريخ الميلاد

تانى سيجارة00

طفل حاضن حلمه

جوه كراسته

في شنطة قماش

أربع حصص ورغيف

وحتة حلاوة

والفسحة فك تجوال

تالت سيجارة00

حِمل أبويا

وكفوفه اللي بيضة

وجيوبه اللي طاهرة

زرعه في ساعة صفا

وسنين حصاد بتطول

رابع سيجارة00

أحلام بتلضم بعضها

للمستحيل….

تتابع الحلم لو بيموت

بيسلم نفسه للتانى

خامس سيجارة00

مالكش غير إنك تعيش

كما اللي عاشوا من قبلك

سنين الوهم بتعيشها

قطيع سارح وليه تشرد؟!

سادس سيجارة00

بتقلب في صفحتك ع الفيس

صحاب

كلام

نصبايه

يموت وقتك كما حالك  

سابع سيجارة00

يمكن توأمه

ما بين الابن والوالد

شريط بيعيد في نفسه

وبيطلع بالزمن قدام

تامن سيجارة00

قصيدة شعر محظورة

ودرج الورق مليان

تاسع سيجارة00

مفيش فايدة

خلاصة قول

وإيه تعمل الماشطة

في قرعة راس

عاشر سيجارة00

وآخر واحدة في العلبة المينى

بوكس/داير يلف

أتارى من غير ما أحس

اتلسعت

آخر نفس

وضى الصبح

يتسرسب

راح أرمى التفل

والطافية

على الاسفلت

وأروح يمكن أحاول أنام .

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange