ط
مسابقة الشعر العامى

قصيدة : مجهول نجاة . مسابقة الشعر العامي بقلم / هبة سمير محمد أمين

 

الاسم ..هبة سمير محمد امين
(شعر عامية)
قصيدة بعنوان

(مجهول نجاة)

نُص الحِساب والمسألة
إن إنت أصل المشكلة
وفيه نُص تانى ف نَص تاه
وِسط النصوص المُهمَلة
باسْرِد حكايتى على الورق
على عُمر جوَّايا اتحرق
عن حُكْم حَبشي من زمان
أصبح طبيعة كل حال
لمّيت رَمَاد قلبى عشان
أخطفلي ضِحكة بدون قلق
عشِّمْنِى عُمري بالحياة
شُوفْت الغريق مجهول نجاة
شُوفْت المريض نَفَسُه اتقطَع
ملفوف بشاشة من الرُقع
قدِّم دِفاع للمصيدة
فَ سِجِلُه مِتْحَوِّل زكاة
شُفْت الحياة من غير حياة
قافل بِيبَان المحكمة
فجأة لقيتنى أنا وانا
كان نِفْسِى يبقى اتنين هِنا
أصعب عواقِب للزمن
إنك تكون غالى التمن
والرُخْص تتنافس معاه
شُوفْت الخلايق همَّهَا
تأمين كفالة كام رِغيف
دخلِت معارك وقتها
بسلاح قوى ولكن كفيف
مِش فارقة مين اللى ابتدا
مرفوعة راية الاكتِسَاح
هَمّ الغلابة أصبح ندى
مِتعَبّى على هيئة لِقاح
والحِلم باش وِسْط الطريق
شافُه السراب زوِّدْلُه ضِيق
دمِّ الضحايا من الزمن
فى الُتربة كان دافِع تمن
أحكى وأقول..ولَّا بلاش؟!
يكفينى أقول ان الكبار
راصِّين حياتنا ورق قُمار
واكلينا نى بــ لحم حى
نازفين فى جُوفهم م الوجع
شوفتوا الفجور؟!!
صابهم فَجع
كان لينا حق ومُنتزع
والصورة باينة بدون فلاش
أحكى وأقول .. ولَّا بلاش؟!
عقلى ف مزاد .. مين يشترى؟
تدريبُه عالى الاضطراب
سهل وبسيط داعم قوى
سيكولوجى يقدر ع الهباب
طب فيه حياة تخفيض كمان
جُملة وقطَّاعى يا خال
خُدها وخلاص مبروك عليك
مساحتها ساعِت 100 شِريك
ضحكتها مظبوطة بفِيك
بس بأمانة .. مفيش ضمان
إوعاك تخوض بِيها ف رَهان
كان قلبى نبضُه على الصِراط
ماشى تمام مظبوط قوى
كان حى فيها على القوى
فجأة الوريد أصبح غبى
كسَّرلى ضِلعى ومذهبى
فيجوز فى يوم كنت الغبى
صدَّقت قلمى ومكتبى
وعشان فقير وأنا صُلبى هاش
غفِّلنى حِلمى وقام مجاش
أحكى وأقول .. ولَّا بلاش؟!
أصفاد فى إيدى ومُحكَمة
صَبُّوا الزلط على قلبى انا
سألونى خرسانتِك تشيل؟!
رديت بكسرة زيادة خوف
مش عنترة وحامل سيوف
أنا شخص شبعان الظروف
كان كُلِّي دود وانا بالحيا
حتى حياتى كات عَيَا
مانيش ملك .. مانيش إله
يجوز بيحيينى اشتباه
سلامى لرحلة هدّتنى
وقتلت فيَّا ما حَيِتْنِى
باودَّع صورة انا فيها
آخر واحد كأنه مجاش
أحكى وأقول ..ولَّا بلاش

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى