من امتى ؟
*******
من امتي وقلب الليل بيحس
بجراح ودموع البني أدمين ؟
أو فكر ليلة يقوم ويبص
علي قلب ليلاتي نبضه حزين؟
أنا ساكت بس
عشان محتار كده بين طريقين
ودموع العين
ونواح وجراح…. وبقايا أنين
أنا ساكت بس
عشان ماتحس
ان انا مبسوط من كفن الموت
وأوراق التوت
اللي ما رضيتش يااكلها الدود
أو حتي تابوت لابس جناحين
أنا واقف هُس
من غير كرباج يمسك ف خناق
ضهرى المسكين
أنا واقف هُس
لا أنا ماشي شمال ولا حتي يمين
انا صورة ما بين صفحات كراس
شيلاه الناس
مش عارف فين هيكون مع مين
وللا لاقي الكلمه أم الحرفين
بين السطرين
انا سيف مكسور ودراع مبتور
لا انا طايل اكون توت عنخ أمون
وللا حتي اكون
تمثال من طين لصلاح الدين
أنا دمع حزين فوق الخدين
برسم ف خريطه بقالي سنين
للحزن الكابس
فوق أنفاس البنى أدمين
أنا قلب حزين
علي ناس تايهين
ولكني ما زلت ف قلبي يقين
انك يا نهار
قادر تتغلب ع الأحزان
وتوزع نورك ع الخلان
وتخلي الدنيا القاسية تلين
********************
