الإسم : إسلام هشام محمد أبوديوان ( إسلام ديوان )
القسم : شعر عامي
الدولة : مصر – محافظة الغربية
رقم الموبايل : 01005198486
عنوان القصيدة : ( طاحونة بشر ) // القصيدة منظومة علي بحر الكامل ( متفاعلن )
******************** النص ********************
النص كامل لاجل ما يشوفه البشر
والكون عثر
ع المهلكات في المحرقة
فراق حبايب في النهار
يلتقوا وسط الضباب
أذن مؤذن في السحاب
إن الثقة عنصر محايد في الخيانة..
وان قطرات المطر
سوسة وجبانة
وساحبة من روحك أمل
طفلين بيجروا ع الطريق
خايفين لا يلحقهم شبح..
صوتي اتنبح
إنه صقيع نازل بيلمس في الجروح
وان الشروح في المدرسة
ما لهاش وطن ..
واني سكن
ليكِ وليهم كلهم
أنا مش مكان تحت الطلب
ولا حتي عامل مغترب
دي القلعة والمماليك بتنده مدبحة
صنعوا الرحى
لجل امّا تطحن في البشر
والمشرحة ، تقريرها يثبت
إن طحنك مش عنيف
وانك بتتحول رغيف
لاجل الغلابة ما يشبعوا
وانك سخيف ..
يشوفوك يقولوا اتدلعوا
النص عمره ما يكتمل
والشعر عمره ما راح يكون غيث البشر
ولا حتى مية مليون قصيدة بتتنشر
هتخلي شخصه الواقعي إنسان سوي
خليك قوي ..
واد فهلوي
بتشف روحك ع الورق
وبترسم الأخلاق حلق
بتبيعه تاخد مجمله
فبتتسرق ..
تصبح مجرد شيء غرق
جوا فْ محيط الذكريات
أنا من سكات راح ارتجل
جملة في بيت يصبح زجل
أو حتى جزء من القصيد جوا السكن
بعد الممات بعد الفراق
أو بعد محصول اشتياق
فرحان قوي إني هنا
شايفك يا امي ساكنة كل الأمكنة
وْشايف أخويا وسكته تشبه يا أمي لسكّتي
لا تحزني
عمري ما اسيبه يبتدي نفس النهاية المؤلمة
ولا راح يظل فْ قلب ناس من فجرهم
نشروا الزنا
والمأذنة صبحت تأن من الوجع
ابنك جدع ..
مات لاجل حربُه ع الحقيقة بفكرته
إبنك يا أمي لسا حيّ فْ تُربته
فلتسمحي لي إني ابوسك من بعيد
على جبهتك
واني أقول لك مية سلام على ضحكتك
إبنك هنا
محتاج يشوف منك فرح
محتاج يشوف روحك بترقص م المرح
زي اللي فات قبل امّا أدخل تربتي
كنتي تقولي يلّا ياد من حتتي
روح يلّا شوف بنوته حلوة تشجعك
وتدلعك
وتجيب لي إبن ابني العسل
أمي يا أجمل شيء حصل
ما لحقتش اوصل للي كنتي بتحلميه
وْحلمي اتكسر
لكني دلوقتي هاقول لك كلمتين
حافظي يا أمي ع الاراضي والبشر
راعي أخويا وارسمي له سكّة
ماشيه للسلامة بدون أمل
وان كان لا بد قبله من الأمل
زوديه بسنام جمل
يشبه جمل
وامسحي له أي فكرة عن كفاح
أو إنه يمسك يوم كتاب يشبه سلاح
أو إنه يتثقف قَوي وْيعرف حقوقه فْ دنيته
أو إنه يمشي فْ نفس سكة انا خُضْتها
قولي النهاية المستحيلة انا شُفتها
وانك لا بد تِنْسَى هذا المنتهى
وصل السلام من فوق فضا والكام سما
أنا هنا..
مستني تيجي تونّسوني ونرتجل
كام نص يصبح كام قصيدة أو زجل
النص دلوقتي اكتمل
وأنا البريء المحتمل إنه ينادي على البشر
من فوق قَوي
ويقولهم
فلتصبحون علي الحقيقة المؤلمة
فلتصبحون علي النصوص المعتمة
وانتي يا أمي تصبحي عليَّ انا
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
