لعشاق المتعة الشعرية .حوار شعرى رائع بين الشاعرين الرائعين على مدكور ونادو فتيحة مدير مكتب المجلة بالإسكندرية
نادو فتيحه .. وعلى مدكور
حوار بين امرأه وصديقها
من وحى قصيدة محتاجه ليك لنادو فتيحه
======================
هى : محتاجه ليك
طراطيف صوابعى اتجرحت
من رقصه طالت
فوق مسامير الزمن
هو : محتاجه ليه ؟
طراطيف صوابعك حننت
قلب الحجر
وداست الخوف والمحن
هى : محتاجه ليك
عشان معاك رغم الألم
والهم باعرف ابتسم
بالتالى تخجل دمعتى تنزل شجن
هو : محتاجه ليه ؟
دا معاكى باتنفس نغم
واحس ان مفيش عدم
واخدك امان واخدك وطن
هى : شايفاك بترسم جنتى وقت اللقا
بالكدب اضحك واعمل انى مصدقه
هو : والله شايفك راحه فى لحظة شقا
فى دنيا حلوه محندقه
هى : لما تتقّل من عيارك ف الهزار
تستعطفك حمرة خدودى
خلاص بقا
خلاص بقا
هو : لما بتقل فى دلع شمس النهار
بأبقى باقول للهم بطل بهوءه
واللى سمع ع الهم
ليس كمن رأى
هى : مين علمك تسقى الشقوق
بحروف حاططها من السعاده ف معلقه
وازاى بتشبكنى ف سحاب
يحدفنى لك مطره ولحن وزقزقه
هو : علمنى مين غير بسمتك
ياللى بشعورك دنيتى متزوقه
يامطوله روحى السما
وبدعوتك بالقى حياتى مشرقه
هى : رغم ان قلبك ع المشاع
وانا قلبى خام
بيخاف اوى كلمة حرام
واخد له ركن ف شرنقه
هو : ازاى تقولى ع المشاع
انا مش فاتحها معشقه
وحتى لو كان ع المشاع
قبل الضياع
خدتيه لأأمن منطقه
هى : بستقوى بيك مطمنه
وبطرف خيط وياك انا متشعلقه
هو : ياشاغله كل الأمكنه
انا اللى بستقوى انا
بستقوى بيكى من الضياع
يامؤمنه
الخيط ربطنى وخدنى جوه الشرنقه
والخيط بدون مانكون سوا
ياريت يكون لى مشنقه
هى : محتاجه ليك
انا قولتها
وعارفه انك أدها
ومفيش معاك مسامير زمن
هو : وأنا ادها
وعايز اقولك زيها
ومن النهارده مفيش دموع
تنزل شجن
هى : محتاجه ليك
هو : وانا أدها
