ط
الشعر والأدب

ماعدش يفرق الرحيل….للشاعر/ احمد ابو شرخ

للتواصل مع المجلة
[email protected]

ماعدش يفرق الرحيل

وماعدش بِتْهِمْ الحياة

بالمسكنة

طول ما العويل

عامل كبير وقائد

كمان الميمنة

أما أنا….

مش ممكن أبقي غير أنا

ماقبلش أكلها بمسكنة

دي مش حياة دي ملعنة

الدنيا صارت ضيقة

لأ.. مخنقة… بل مشنقة

تحصد رجال

وتسيب عيال

أديها قذرة مشققة

في شقوقها راح دم الشباب

والحلم غاب

والشمس غابت م الضباب

والحقيقة ملفقة

فيه إيه بقي…؟؟؟

بقي كل حاجة مزيفة ومزوقة

وعشان تعيش ؟؟؟

تبقي بطة ملكش ريش

أو حتي تبقي بغبغان

تردد اللي يقوله منهم

 الحيتان

وتقول كمان

ليهم أمين

ولو أنت مين ..؟؟؟

كمان هاتعمل أراجوز

ترقص كتير مع الزمان

وتمد بوز

وتبوس أدين

كل الحيتان …

ولو ف الحياة

تريد أمان

لازم تطاطي وتنحى

للندل منهم والجبان

يبقي الرحيل

ماعدش يفرق

طول ماانا…!!

ماقبلش ابقي غير أنا

ماقبلش اكلها بمسكنة

وها تفرق إيه..؟؟

إذا كان فَرَحْ أو محزنة

طول ما الولد

مغلول أديه

مخروس لسانه عن الحقيقة

ومعصبين دايماً عنيه

منزوعة منه قوته

ماتت في حزنه

الابتسامة وضحكته

أصبح لا شيء

وصار  حطام في دنيته

حتي الممات بقي يرفضه

ويروح بعيد عن سكته

بيقول عليه مات من زمان

من يوم ما وطي

تحت رجلين الحيتان

جاب لقمته

بالسم كات معجونه

له وسمته

بس مغَرَّور بالحياة

ومفهماه

بأن له سلطان وجاه

وهو في دروب الزمان

ضل المكان

والْحِمّْل وياه

صار تقيل …

أما أنا ….!!!!

فما عتش يفرق الرحيل

ومش ممكن ابقي غير أنا

ومهما كان المستحيل

ماقبلش اكلها بمسكنة
311516_307727616026738_627841176_n

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى