مسابقة شعر العامية
قصيـــدة / وسط هشيـــــم الذكريات
ـــــــــــــــــــــــــــــــــــــــــــــــــــــــــــــــــــ
فى ليلة مرطبه ..
بعطر الماضى إللى فات …
وسط هشيم الذكريات …
فى صندوق قديم ..
بصيت لقيت حبة صور ..
لناس كتير كانو زمان ..
لكن خلاص مالهم أثــر
.. مالهم وجود غير فى الصــور
*****************************
لقيت صورة بيت جميل
حواليه النخيل ..
حواليه الشجــر
معقوله دا البيت إللى ملياه الشقوق
ودا النخيل ..
ودا الشجر ..
إللى صبح خشب محروق ..
معقوله دا هواه نفس البيت إللى إتهجر
***********************
وصورة لبنت صغيرة ..
قالوا عليها جدتى ..
جادلة على كتافها الضفاير ..
فستانها أبيض فل صاير ..
ضحكتها تشبه ضحكتى
.. فستانها فى الصندوق لقيته ..
بس كان لونه إنكسر .
****************************
لقيت صوره لناس كتير ..
حاسس بحالهم فرحانين..
فى الصورة كان صندوق جميل ..
وكإنه هو إللى قصادى …
بس ليه خشبوا إتبدر ..
دى الذكريات حكم وقدر
ــــــــــــــــــــــــــــــــــــــــــــــ
بقلم / عبدالمجيد السويدى – مصــــر
