ط
مسابقة الشعر العامى

وبتمطرسمايا دروع. مسابقة الشعر العامى بقلم / محمود سرحان من مصر


محمود سرحان
القاهرة

وبتمطرسمايا دروع

منين ابدأ
واقول فيكى
كلام يتعد من احلا الحروف
في خشوع
بتاخر عنى نبض الخوف وبتأنا
بطفح الدم بنحاول
نهيئ جو من زاوية
بنى مغلوب على امره
بإن الكد مش ع القد
اكيد راح بكره تتعدل
هاعطر شرخ احزانى
ببسم الله
على سنة رسول الله
بدرت البذره تتحنى
ف ارض اللهفه ع الاحساس
ولبلاب الحنان حوط
وخلا الرؤية مش باينه
كإن العشرة شبوره
ملامح هيكل الاحداث
بتجرجر قصاد الخلق
وانا حاسس بخبط ورزع ف الننى
ولسانى مكممنى
وبصرخ ف العشم بكره
يصحى الحلم يتحقق
والاقينى قصاد منى
وامطر من سمايا دروع
تدارى عورة العفه
ياقلبى اشفا
من الهم اللى مالى خزاين الحرمان
ورتل قد ما تقدر
وزحزح نبت متدارى
ورى لعنة بنى خاينين
يامين يفهم
دموع الحق ليه بتغزل
ضفاير نور
سكون الليل بيتحاصر
وآن الهمس جوايا
تزم ف مين
بنى ادمين
هنا شويه بيشتغلوا
بلغة العصر ناس تانيه
هنا موبايلات بتخرب بيت
حريم ناقصه
هنا مناقصه
على سمعة بنات الناس
وادى النسناس
بيتنتط عشان يصطل شباب هايف
وانا خايف على سراطى
يانفسى نفسى ما تطاطى
انا مرعوب على جدر الاصول
ليقول وانا مالى
اغير فكرى واتامرك او اتصهين
وعمرى ف مره ماهاصهين
واكون ديوس
انا الحارس
على باب الغموض متاهات
وانا الفارس
ف كل متاهة تلاقينى
بشد الجزع وبصحصح
فروع دبلانه تتجدد
جيوش سرى بتتهدد
عشان اصلى
انا مصرى
مانيش فرعون
بعون الله
اكون طوق النجاه لبكره
من المينا اللى سابها سعيد
بقولهالك هارجع فرحتك تانى
لكين بالصبر
اوضيكى وهارقيكى
واسيبك طاهرة لا فيكى
عاراية فكر والمعنى
ياست الكل دمعنا
على ظروفك وعلى العيلة
يااحلا واغلى ضليلة
بشوف فيكى انا ولادى
بيجروا عليكى تتعتبوا
ببسمة نيه صافيلهم
بقولهالهم واقولهالك
فروع الوهم تحلالك
ده ف الحاضر
يمدوا المنطقة تانى عشم تايهين
وانا اللى بداوى عنوانى
وبنزع فكر عدوانى
بيتتعلب
وينفخ نفسه ع الفاضى
انا القاضى
وده حكمى ف دستورى
تداول سلطة الادمان
على عرش الملك نعسان
مافيش بيضه هاتنسخ نفسها بحكمه
عشان تفقس على الكرسى
مجالس دولة المتاعيس
تفوق ناصية الافكار
وتستجوب جواز سلطة
برأس المال
مفيش اهمال
ولاحفنة غلط هتفوت يمنا
يفوت ولو قلبه الحديد وسكوت
ماعدش خلاص هنتفلفص
من الكيميه اللى ماليه معدة العيله
بقوة ردع هانعدى
على نبض المرار وحقوق
حقوق الكون ده راح ترجع
مافيش دخان
مافيش حرمان
كرامة اسرة متحاوطه بفكر جبان
انا الانسان
وليه فى الحقوق فدادين
مزارع خوف وبرويها انا ترتيل
بطبطب ع الرؤى الخضره
بكف دموع واهديها
تئن لحضنى من تانى
انا الفانى
لكن هترك هنا قوانين تكون
اباچوره للتعتيم
لجيل تانى
عشان يحمى عرايا الفكر م التوهة
بدافع من ضمير سايل
وفاحت نهر م الالهام
تعالوا نفصص المعنى
ونبدر ف القلوب دستور
يطهر فكر اهل الدرب
بحكمة ناصية افكارنا

وطيبة قلب اهل زمان

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange