محمد السيد سعد
شاعر سكندرى
و مقيم بدولة الامارات
اسم القصيده : آخر شهقه
1
مشهد من فيلم حياتك
مالهوش تبرير
ناس فرحانه و ناس بتعيَّط
ناس بتخيَّط كل حقيقه
بِحلم ضرير
و شماتة حالك فـ الماضي
على حالَك بعد التغيير
اصحاب كانو اعز اصحاب
مابقاش فيهم اي ضمير
كلها تخاريف ساكنه الاحلام
بس الاحلام مالهاش تفسير
2
مطحنة الايام بتقطَّع
فـ سنين العمر الدبلانه
و لا شايف شيء ممكن يشفع
و لا يروي الروح العطشانه
انا مُت عشانِك 100 مره
و رويت ارضك بدموع دمي
غمضت فـ عيني و حضنتِك
علشان فاكر انِك امي
صليت لما كعابي اتشقِت
و صبرت الصبر الايوبي
و دعيت من قلبي المِتفتت
و عشانِك شقيت فـ هدومي
طب اعمل ايه تاني قوليلي
مش فاضل غير اني استسلِم
و ابيع للى هيشتري اكتر
صوتي و ابطل تاني اتكلم
3
ساعدينا نبوس راسِك ياما
بطلي توهان مانتيش قده
رخصتينا جوه و بره
حتى الرُخص .. سايق عِنده
افتحي شبابيك رحمِة قلبِك
و خدينا على جزيرة شفقه
طبطبي على وتر الحنيّه
بكفوفِك غنيلنا شويه
لو حتى ثواني قبل ما تِطلع
روحنا و نِشهَق اخر شهقه
