عدت سنة
وعدت أربع فصول
والقلب لسه
م الفراق بيقول
الأب ضهر لو راح
الضحك زال
الموت حقيقة خلى المستحيل معقول
ابويا علمنى الكتابة والتعبير
صبح القلم صاحبي والحبر كان لي اسير
ابويا علمني أكون شاعر واقول مواويل
وزمنا اصبح زمن م الصعب فيه التعبير
وحشاني كلمة بابا وانت تقوللي ايوه
وحشاني لمسة ايديك على ضهري
وحشاني جملة واحشني يا محمد
ضهري انقسم لابأمرك ولا بأمري
كنت تقوللي وتحكي حكاياتك في الحياه
وكنت بزهق واقول يااااااه
انا مالي
واتاريك بتحكي لي عن بكره وعن حالي
ياريتني كنت سمعت من غير زهق حالي
فاكر يا ابويا اخر بوسه من راسك
كنت ممدد بعد ما أعلنوا موتك
بكيت عليك دمعة نزلت حريقة
صديقة ملازماني وصوتها فوق صوتك
ابويا مات فجأة ضهري انحنى بموته
وحشاني صورته اوي ووحشني كمان صوته
وحشاني ابتسامه كانت بتوصلني منه
في الجنه يا ابويا الفاتحه على روحه
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
