شعر العامية
.. ” أحلام في اليقظة ” ..
جاني ساعة الفجر طيفه
زي اضواء المدينه
نوره ساطع جوّه قلبي
والكلام كان بين عنينا
قال لي اصحى الشمس هلّت
دا الساعات الباقيه لينا
قلت له انا لسّه بحلم
سبني اوْصل أي مينا
كنت بحلم حلم عادي
ابقى قبطان السفينه
يمكن الاحلام ترجّع
حلم ضايع من ايدينا
وافتكرت عيال حارتنا
كنّا نتجمّع في بيتنا
وامي تفضل لينا تحكي
تحكي عن سيدنا موسى
والمسيح الحي عيسى
والحبيب الغالي احمد
كنّا بنصلي ونحمد
والدموع دايبه فـ عنينا
اصل كان الكل واحد
لمّا كان الخير مالينا
واعتصمنا برب واحد
شاء ورجعت سينا لينا
بس ايد الغدر خانت
قلت يبقى منّا فينا
رد قال لي اصحى واحلم
بس حلم الفرقه زينه
لو نزيّن بيها فكره
شمس بكره هتعادينا
يا رسول الله يا طه
نفسي ازورك يا نبينا
وادعي ربّ الكون ينوّر
قلب قبطان السقينه
بنتي نادت قوم يا بابا
أمّي بتنادي علينا
كنت بحكي لها حكايته
بس خدني الشوق لمينا
لمّا افلاطون سألني
امتى تبني لك مدينه ؟
شعر
عمرو إبراهيم سيد احمد مليجي
مصر 01120103020
