قصيدة للمسابقة شعر عامي بعنوان(آخر قرار)
هو مين بس اللي قالك
إن بُعدك عني نار
وإنى بَعدك أو في بُعدك
بوصل الليل بالنهار
مين اللي قالك إنى دايبة
والحياة ف الُبعد صعبة
قلبي لسة ما داقشي غربة
أو حنين وعذاب وفُرقة
لأ خلاص معدتش فارقة
مش هعيش أنا ف انكسار
مش هسلم باللي كان
اللى كان في القلب كان
لما كان لك فيه مكان
ضاع خلاص منه الأمان
والمحبة والحنان
مش خلاص القلب هان
عمرى م اقبل الاعتذار
كنت بقدر إنى أسامحك
مهما زاد في القلب جرحك
كنت بسرق من ملامحك
ضحكة بتصَحِّى النهار
كنت بقدر ع الأسِيَّة
والآهات المِدَّاريَّة
والخيانة هيَّ هيَّ
والألم أصبح مرارْ
كنت دايماً مني تهربْ
لما بحتاجلك وأقرَّبْ
كنت عايشالك بقلبي
بس قلبك كان بيكدبْ
كان بيخدع ليل نهارْ
اللى حبك عاد بيقسي
إنت مش قررت تنسي
واللى قالك قلبي لسة
نبضه عايش ف انتظار
كان بواسي دمع خدك
ابعد إنت وسيبني بَعدك
قلبي عايش رغم بُعدك
مستحيل أقدر أسامحك
أو ف يوم تبقالي دار
هو ده آخر كلامي
هو ده آخر قرار..كلماتي ولاء حجازى فتحى الحصرى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
