خاص بالمسابقه ..
الشعر العامي ..
اسم القصيده [ أمي ] ..
– إهدَاء –
إلى حضنك في جوف الليل ..
إلى دمعك في كل صلاه ،،
إلى صبرك على الأوجاع ..
إلى طمعِك في عفو الله ،،
–
إلى القلب اللي لسه ابيض ..
ودم وريدي من دمُّه !!
إلى الإبن اللي عاش عاشقك..
وماشي فـ دنيته بأمُّه !!
– النَص –
يامُّ طيف النجم سابح كل عمره فـ شوق هواكي !!
ياللي هام العقل فيكي واتسجن فـ سحاب سماكي !!
ياللي شوفتك ع القصايد فارشه سطر العشق جنًّه ،،
عشقي ليكي أساسه سُنَّه سيبت شِعر الكون معاكي !!
ملحماتي ..
أغنياتي ..
دندناتي فـ قصر سِحرك!!
غرَقي لما نزلت بَحرك!!
زُهدي من كل الصَبايا ..
لما صيغتك سيمفونيَّه من القوافي بدون موسيقى !!
انتي أوَّل مَن فتحتي القلب ليكي ..
[ كَي تكُوني للمُنَى أحلَى صَديقَه ]
[ كَي أسيرَ منَ الليالي قاصداً شمسَ المَوَدِّة في نَهَارِك ]
بعشق الليل اللي سارح من سمارك ..
بعشق الأسرار في صوتك لما تدعي مفوتش دارك ..
واعشقك أجمل سكوني ،،
صبر عمرك ويا حالي لما بتشاقى بجنوني ،،
مركبك لازم هتوصل حتى لو كانت بدوني ،،
مانتي كوني فـ كل حالي ..
عاكسَه طيبتك ع المعيشه ،،
نفسي مره أسُر قلبك ..
واشتريلك كام غويشه !!
[ إنَّني يا عشقُ عُمري دون ظلِّك ]
زي ريشه ماليها مَرسَى !!
كل حاجه وارثها منك ..
لسه داخل جسمي غارسَه ،،
لمَّا بتمرَّد في عيشتي ..
وامَّا بتعصَّب واسامِح !!
وامَّا بكسَر أي حاجه ..
يبقى يومي ملوش ملامِح !!
لمَّا بتأثَّر بدمعَه ..
وقت عشقي للهزار!!
لمَّا بتصبر بروحِك ،،
قبل ما اخد كام قرار !!
لمَّا لمَّا ،،
لمَّا بتدفينا لمَّه ،،
لما نتجمَّع في أكلَه..
– ( يلا مين في ولادي سمَّى ؟! )
مهما اصيغلك مـ القصايد ..
مش كفايه عشان اصارحك ..
إنِّي حُزنِك وقت فرحِك ،،
إني أكتر حد سابلك تعريجات في خطوط حياتِك ،،
إني أول حد فاتلك تنهيدات على تنهيداتك ،،
إني أكتر حد عايزك جنب منه ..
تسنِّديه !!
إني عامل زي طفل فـ صحرا حُبِّك ..
عايزك انتي توصلِّيه !!
إني حاسِب كل دمعه فـ وقت آهه ،،
إن كل دموع عنيكي لمَّا تدعي لقلبي دعوه ..
بعرف الفرحه اللي جايه مِن وراها !!
إني ابنك ..
واني ضلِّك..
واني أجمل شئ فاضلِّك ،،
واني خلِّدتك في رُوحي ..
شاغلَه عقلي وشاغله رُوحي ،،
شاغلَه حِبري على القصِيد!!
ماشيه داخل كُل مسرى لدَم شوقي في الوَريد!!
عبلَه ماتت..
ليلَى فاتت ..
” قيس وعنتَر ” في الملاحم عجزو حتَّى يلخصوكي فـ تُوب نشيد !!
[ ” سَافُو ” يا حرفَ الصَبَايَا ..
يا أنوثةُ كلِّ وادي ،،
مَاتَ شِعرُكِ في مُوَاجَهَةِ العَشِيقَةِ في كَيَاني فَلأرَى ..
هَل مِن مَزيد ؟! ]
وفـ ختامِك..
أرجو إني أنول سلامِك ،،
واني انول في الكون رضاكي ،،
واني أفضل جوَّا ضِلع الشوق في شوقك أحلى عيد !!
واني اصير في حدود ملامحك إبن طايع ،،
لسَّه تَحتَ فرُوض ولايتِك كالوَليد !!
