أنا الطير اللي مش جارح
بيعفو وينسي ويسامح
في ملك الله بطير سارح
عشان الحَب والميّه
ماليش أسراب ولا عيلة
بخيلة غربتي طويلة
وفيها فخاخ وميت حيّة
عشان بتناسي واتعطّف
جناحي ريشهُ متقطّف
ودا يشدُه ودا يخطّف
سيبولي بكره إن امكن
كفاية يومي وامبارح
أنا الطير اللي مش جارح
وكم مرة بنيت العش
واحط الريش ف حضن القش
وتيجي الريح تهد تؤش
فالملم نفسي وشتاتي
وادندن كرد بيّاتي
وتخلص كلّ أوقاتي
وانا بحلم بخير طارح
وانا الطير اللي مش جارح
……………….
