للمسابقة ( شعر العامية )
محمد محمد وجيه
مصر
موبايل: 01285903005
أنين البريء…..
أمانة يامّا تصحي تاني
اِصحي مرّة ولو عشاني
بيقولوا ماما عند ربّنا
قولتلهم محتاجها أنا
عايز أشوفها ولو ثواني
معقول تسيبني وتنساني؟
هى عايشة بسّ عشاني
أنا حياتها وهى كياني
اِصحي يامّا وكلّميني
كذّبيهم واحضنيني
مش كنتِ دايماً بتعلّميني
كلمة تملي بتحييني
أنت يا ابني كلّ كياني
هعيش عشانك الأماني
اِصحي يامّا واِرحميني
لو عايزة حتّى تضربيني
أنتِ قلبي و نور سنيني
شايفه دمعي سامعة أنيني
الحرب أخدت بابا منّي
حسّيت بموته رغم سنّي
أنا في حبّك يامّا أناني
عشان ماليش حدّ تاني
كلّميني لو كلمة واحدة
كفاية يامّا الدّنيا جاحدة
قاسية عليّا وكمان عليكِ
كنت بشوف دموع عينيكِ
ببكي لوحدي وألعن زماني
وكلّ حاكم ملعون أناني
عشان يحسّ أنّ ظلمه
همّ أكبر من كلّ حلمه
كتير ظلمنا و دمّر حياتنا
مش هسامحه ليوم لمماتنا
قلبي يامّا بيبكي بحرقه
ناره بتغلي من الفرقة
اِصحي يامّا وفهّميني
أنتِ حقيقي هتسبيني
هعمل إيه في الدّنيا ديّه
ومين هيمسح دموع عينيّة
يعني صحيح اللّي قالوه ؟
ماتت أمّه زيّ أبوه
هتسبيني زيّ الغريق ؟
ذنبي ايه أنا بريء
أنا ماشي يامّا و أوعدك
بحقّ ما حلمت أسعدك
وباسم كل نقطة دمّ
سالت ظلم في ظلم
ليكون كلّ ظالم أناني
سجين جهنّم بكلّ المعاني
…………..بقلم……………..
……..محمد وجيه…………
……………مصر……………
