آه يا وطن بقلمي // يسري عبد اللطيف مطاوع (( شعر عامي)) من جمهورية مصر العربية مركز ومحافظة سوهاج / قرية أولاد شلول..خاص بالمسابقة
******************
لسة زي ما أنت في كبوتك
وكل الديابة بتنهش لحمتك
وكل الكلاب بتعوي وتنبح
والنفاق والكذب لسة أزمتك
لإمتى هتفضل بالآه تصرخ
وما حد راضي يمسح دمعتك
فين الشباب اللي وعد يبنيك
وفين العلم اللي ينور سكتك
آه يا وطن وألف آه عليك
مجروح وجرحك بيعذبك
عدى نهارك وليلك طال
وانت بتآسي لسة بحرقتك
الكل باعك ونام وارتاح
وتبددت في الظلام ثروتك
نفسي أصرخ نفسي من زمان
نفسي أمسح بإيدي دمعتك
عزك اللي كان مالي زمان
ليه انهدم وانت لسة بشدتك
مات الولد اللي كان حاميك
بروحه وبكل لحظة يحرسك
والشمس غابت وعدى النهار
والليل طويل والوجع بيألمك
طب ليه يا زمان المحن ليه
تحمله كل المآسي وليه بلوتك
آه يا وطن أبكي عليك العمر
واللا أبكي على طول محنتك
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
