الاسم/ محمد عيد محمد عسل
إسم الشهرة/ محمد عسل
صفحة الفيس بوك الشخصية/ محمد عسل
صفحة الفيس بوك العامة/ الشاعر محمد عسل
رقم التواصل على الواتس/ 01282563520
رقم التواصل الشخصي/01010431461
مشاركتي في المسابقة فئة شعر العامية
(أوڨر دوز)
أنا كُنت يوم زِينة الشباب
أول ما بامشي الأرض تحضُن خطوتي
لو شُفتوا صِدري تلاقوا باب
مفتوح وكاشف نور بيسرِي في جِتِتي
وقت الصلاة كُنت الإمام
والناس بتبكي من حلاوة نبرتي
وف لحظة كُنت ضعيف جبان
سلِّمت نَفسي للشيطان
وعَملت حاجز بالذنوب
-عَزَل السجود عن جبهتي-
شِلة صحاب أَخدتني رجلي عَندهُم
وصبَحت واحد مِنّهُم
– سَكران وناسي كل حاجة ف دنيتي –
وبقيت خلاص مُدمن سموم
أول ماباصحىٰ ياناس وأقوم..
بابدأ أدوَّر هيّ فينها جُرعتي؟
أنا لو بإيدي صدّقوني هاتلاقوني حاطتها تحت مخدتي
لكن بخاف من كل شيء
مانا حد جوة عيونكوا مُجرم مش بريء
وعشان عَزيمتي مش حديد
بابدأ أضُخ السِم في عيون الوريد
فباحِس دمي جوة مِني قام مِشي
أفرح وقلبي بينتِشي
وادخُل في عالم كل شيء جوّاه خيال
عالم بيمحي للهموم لو حتى كانت من جبال
عالم جميل، عالم وفيه الضِحكة تِتحوِّل صَهيل
عالم وفيه النملة ممكن تبقىٰ فيل
باكُل كتير وأشرب كتير، وباحِس طعم الشاي -عِنب-
فاقعُد أدخَّن عَ الكنَب
دُخان سجايري بيترسم فوق الهوا إنسان عَليل
بيمِد إيدُه بلاقي فيها الخوف تِقيل
وانا غصب عني بامِد روحي ياناس وأشيل
السِم بعد ساعات بينوي للغياب
وأنا ضهري مُمكن ينكَسر مِـ الإنسحاب
بادخُل في حرب وفيها قلبي بينهِزم
والإنتصار دايمًا يكون -للإكتئاب-
فاحقِن وريدي بجُرعة أكبر مِـ اللي كانت قبلها
واللهِ كارِه ليها جدًا بس -أضعف مِنّها-
يااااا بَلوتي.. السِم مِني إنتهىٰ، والمال -مفيش-
وَطِّيت بـ راسي للي يسوىٰ ومايساويش
الكُل كان بيقول إجابتُه -مامعاييش-
مَدّيت إيديّا في جيب صحابي كلهُم
وبقيت أألِّف للقصص علشان أحنِن قلبهُم
مثلاً بقول إبني مريض، وافضل أعيد وافضل أزيد
تكرار كلامي في الحكاوي كان موّازي لـ رفضهُم
حَسّيت بإن الكون سوّاد -حَطّيت مِراتي في المَزاد-
فقالت لي لو هاتكون رخيص، أنا ضافري أغلىٰ من سمومك والبلاد
شَدِّيت حَلَق من ودن بنتي -قطعتها-
لمِّيت هدومها وبِعتها
أمي إشتَكت من غلطتي
تَبّت يَدايا عشان ياخلق ضربتها
وسط العِياط والوَلوَلَة، والإنشغال والبَرجلَة
أنا قُمت مادِد إيدي خاطف منها أخر سِلسلة
أنا بِعتها بأرخص تمن، علشان أجيب حق البَلا
رُحت إشتريت أربع جُرع أو قَد يَزيد
من إشتياقي -ضَربتهُم- جوّة الوريد
الدنيا فجأة إتحوّلت من بعد دوّشتها لـ سكوت
والقلب قام صارِخ قوي، أتاريها صرخَة أخرها موت.
محمد عسل
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
