الإسم : إيهاب حمدى الشابورى الدولة : مصر – بورسعيد الهاتف : 01205383221 القصيدة : شعر العاميه العنوان : إِبنـِــــك الحِيــــــلَه ………………………………… وليه بقـه تهربـــــــى منى؟ وإيدِك دِيا تِظلمــــــــــــــنى يِجيلك قلب تقوليهــــــــــا؟ تِقولى إنــتَ مُــــش إبنِى ……………………….. عشان صرَخت فِى وِشك لما الفساد سَـكَن عِشك وعِينك نَبِتِت غِربَـــــــــــــان تِفَرع غُلب عَلى فَرشِـــك ……………………….. عَشَان استغفرت لِذنُوبِـك ورُوحِى نَضَفِت تُوبِـــــــــك وأقولِك تُوبِى مَاتِــــرضِى تِعَاندِينى وتِدمنِى عيُوبِك ……………………….. دانَا بَرضَى بشويِة فُــــــول وهدمه تِعدِى بىّ الحُــول وعَلام مَعدش لُه عَـــــــازه وسَقف تَحتُه مالِى عزُول ……………………….. أقولِك ضُمينِى فِـ نهَـارك تِرمِينى وتُحضُنى مُــبَارك جوَازة الشُـــوم وآخــرِتها لَقيتنِى غِرقت فِى عَـارِك ……………………….. كإِن قَارصنِى مِية عَقـــرب كارِه نَــفسِى و مِتكهـرب بِألف يَمين مَانا رَجِعــــــلِك حَالِف لأسَافِر و هَتغَــــرب ……………………….. دَا قطرِك دَا ولا نعُــــوش؟ عَليها دَمى صَار مَنقُـوش فَايت بَرك وهَركَب يَــــــــم أتَارِى يَمِك كُله قــــــرُوش ……………………….. ويِوحَشنِى فِـ غُربـــتِى ذُلِى شَفِيقه نَدَهِــــت يا مِتولـى بَلِّــم غُلبِى فى الشَــــــنطه وبَرجَع بَـــــس مِش كُــــــلى ……………………….. بَرجع تااااانى مُشــتَاق لِك دَرويِش أبُوس تُراب أهلِك وبَترجَاكى عَشان خَاطــرِى ذلِينى برَحمَــه علَى مَهلِك ……………………….. قُوليلِى غِلطت إِنتَ كمَــان بِدَمعى أقُولك آنَــا غلطَـان دا اللى مَقالشِ فِى عُمره كِلمة حَـق يبقىَ جبَـــــــــان ……………………….. هَحطط عَن راسِك الشيـلَه ولَجل مَا تِرجَعى جَمِيــــــلَه بِعِلو صُوتك يَا مَايَــــــــــــــــا قُولى أِنى إِبنِك الحِيــــــلَه : : : : : : : : : : : : : : : : إيهــــــاب الشــــابورى
