صباح الخير
على اللي عيونه هتدمّع
وع اللى شافنى وما دمّعش
دا .. ابويا اللى انتو شايفينوا
ف قلب النعش
و ده ما يمنعش
بإني بجد راح أصعب عليكو كتير
و إني بقيت ف عز الهم وحداني
وإن الدنيا واخداني ل حزن كبير
و بيرغرغ ف عنيكو الدمع علشاني
.
و انا رغم إني ما كبرتش
ومافهمتش قوي الدنيا
بقولكو .. لأ
لأن أبويا عاش راجل
و مات ع الحق
بقول للي مايعرفهوش
و اللي كانوا عارفينو
أبويا اللى انتو شايفينو
طريح الموت
ما كانش جبان
دا كان فارس من الفرسان
وكان إنسان ..
عظيم مايهزهوش جبروت
ف وقت الشغل كان حازم
و كان عازم
يا تبقى مصر منصوره
يا إما يموت
و وقت ماييجي يلاعبني
أشوف ف عيونه حنيه
كأنه لسه بنت بنوت
.
ابويا اللى خلاص سابني
حبيبي اللى خلاص سافر
كتير فادني و علمني
و كان دايما يفهّمني
بإن اللى يخون بلده
يموت كافر
.
و انا قد الكلام يابا
انا ع الوعد ده مرابط
انا وحياة عنيك انت
بأمر الله هكون ظابط
هكون زيك
و اكمل نفس مشوارك
و أجيب حق البلد يابا
و أجيب تارك
مفيش أقرب من الأيام
و بكره مهوش عليا بعيد
فاروح ل الجنه و اتهنى
وصدقني هتبقى سعيد
سلام يا أغلى من روحي
وأكتر حد فاتني وحيد
هتوحشني يا نور عيني
هتوحشني قوي ياشهيد
.
*******************
.
محمدهيكل
