يسرا حسين حامد
(يسرا العجمي)
مصر
نص عامي
أرجع يا زمان
اللون الاحمر كان ديما يعنيلي الخوف
اللون الاحمر كان ديما يمنعني اشوف
حاجات حابب اني اعيشها وعليها ملهوف
ومهما الدوا بيكون علقم دا اكيد موصوف
اللون الاحمر كان ديما بيكونلي اشارة
لحاجات بانت وحاجات لسه محتاجه اماره
وانا يوم ماهشوف الضوء لحمر راح افوز بجدارة
مش كل شعاع للون لحمر يدينا حرارة
اللون الاحمر كان ديما مفتاح حكايات
لاميرة التلج وكوتشينة الشايب مات
وحاجات كانت حلوة خسارة وزمانها اهو فات
مش كل اتنين في الهوي حبوا بيعيشوا في تبات
اللون الاحمر في الغالب يعني المكتوب
مرسال لاتنين عاشوا وحبوا والهوي مغلوب
وان كان العشق دا مش ذنبي انا بكرا هتوب
ربك عالم بالي في قلبي مهو رب قلوب
اللون الابيض كان ديما يرمز للخير
اللون الابيض خلاني ……. من ضيه اغير
فستان لعروسة في زفتها …… مالفرحة تطير
وانا نفسي في حظي اكون اول ……… ومكنش اخير
اللون الابيض فكرني ديما بحاجات
حكايات جدتي لما بتحكي التعلب فات
وافتكر الاولة وحجلتها ……….. وسبع شقفات
والمخفي حسام لما بعتلي ………. خلينا اخوات
اللون الابيض كان رؤيه لهلال رمضان
تستني المفتي يقول صوموا …………… وتبات فرحان
وقطايف حلوة وفزورة نيللي وشريهان
ومنادي ينادي يسحرنا ……… الله يا زمان
اللون الابيض فكرني بضي الحاره
فرقعة البمب وصوريخنا عملت غارة
تكشيترك لما قالت امك طبخة بصارة
ويا ريتها دامت … بس اهي عدت …. الف خسارة
اللون الاسود فكرني بمطحنة البن
تحميصته لما تفوح منه …… انا قلبي يحن
اشربه وانا بسمع صوت ثومة ….. ايه تاني اهم
فنجان القهوة المتحوج ……. بينسي الهم
اللون الاسود فكرني بظهور الشيب
وانا لسه امبارح متعلم …… ميصحش عيب
وبقطع في الورد وادور علي اسم حبيب
ولا عمر في لحظة فكرنا ايه جايبه الغيب
اللون الاسود فكرني بظهور الشيب
