ايمن حسن محمد احمد عبادة الشهرة ايمن حسن عبادة سوهاج طهطا قرية الشيخ مسعود
قصيدة مشاركة فى شعر العامية إزاى تقولى إننا ابنك إزاى تقولى إننا إبنك وإنتى أمى بتحمينى وانا لا ليّا فيكى غيط ولا بيت بيؤينى ولا عارف ألاقى فيكى لقمة تكفينى ولا هدمة تدفينى ولا شربة ميّة صافية ساعة الظما تروينى
فبلاش تقولى إننا إبنك
وانتى أمى بتحمينى
أزاى تقولى إننا إبنك وانتى أمى وانا منك وانا اللى راضع صناعى ما دوقت يوم لبنك ولا دوقت يوم خيرك ولا عسلك ولا سمنك ما شوفت غير همك ما شربت غير حزنك كإنى مش إبنك ولا منك جاحدة وناكرانى كإنى طفل مش شرعى كإنى نبت شيطانى بصر خ أنا وحدى ولا إنتى سامعانى ببكى أنا وحدى ولا إنتى حسّانى كإنى مش لحمك ولا دمك ولا فى شهادة ميلادى بحمل أنا إسمك فين حظى مع اللى كلوا خيرك مع اللى رضعوا من صدورك ومن صدور غيرك اللى شهايد ميلادهم فيها كذا أم ولو ضعتى يوم ما يشعروا باليتم
والله ما هى َّ حكاية فلوس ولا مأكل ولا مشرب ولا ملبوس الحكاية حكاية كرامة وعزة نفوس حكاية عدالة تسّوى بين الرؤوس أنا عندى أعيش ع الملح ولا آكل لحمة فتات أنا عندى أنام فى الطل ولا أسكن مقابر الأموات أنا عندى أموت وينحرق جسمى ولا اندفن فى مقابر الصدقات
مش عارفة أنا مين أقول لك أنا مين أنا الملك مينا موحد القطرين أنا الملك خوفو سيّد الفراعين أنا الأمير محمود وانا صلاح الدين أنا قاهر الهكسوس والمغول والفرنجة فى حطين وانا شوكة فى ضهر الصهاينة ليوم الدين
مش عارفة أنا مين أقول لك أنا مين أنا اللى زارعك خضار وانا اللى بانيكى عمار أنا اللى واكل علقمك وشارب منك مرار أنا اللى بتعب وانا اللى بزرع وغيرى قطف الثمار تعاملينى كما الأشرار تعاملينى كما العبد وانا سيّد الأحرار
مش عارفة أنا مين أقول لك أنا مين أنا اللى حَبِّك وبقلبه شافِك وانا نوحِك لما الطوفان غطى كتافِك أنا أيوب صابر على مرك وانا ابراهيم عايش أنا فِ نارك ولا قادر فى يوم على هجرك ولا عندى اختيار غير إنى أختارك ما انا ملحك وانا عيشك وانا جندك وانا جيشك وانا حصنك وأسوارك ما انا أصلك وانا فرعك وانا نيلك وانا زرعك وانا بيتك وانا دارك
ومهما تعملى فيّا ومهما تطلعى عينيّا حالف ما انام الا على صدرك حالف ما اشرب الا من نهرك حالف ما اتغطّى الا بلحافك حالف ما ابكى الا على كتافك
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
